性行為疑慮,求解答🥲

我係男,對性行為有以下疑慮,本人從未同女友完整完成一次性行為,令到女友好失望,我亦好內疚,因為有以下情況

前戲時:

  1. 佢會用手口幫我,自己會用手幫佢,但我未接受到陰道既質感,會覺得小小核突,從未試過用口,都係怕核突

  2. 會隔住褲模擬抽插動作,都好興奮,但當除曬衫服後就會無唔太想,並唔係女友身材唔好,係我過唔到自己心理 (eg 陰道質感核突,另外好驚即使戴套都會有bb)

所以係前戲咁既心理狀況電去當準備性行為時:

  1. 當戴套時,我陰莖好多時就會軟,入都入唔到,最後失敗告終,即使有時間硬,但我都只係入到啲啲,亦係無試過完整完成一次性行為

  2. 我好驚有bb,所以唔敢太大動作

  3. 驚女友痛,佢曾經講過會小小痛,令到我都唔敢再繼續插

往往每次都係失敗告終,女友都好失望,我亦好內疚,呢個問題纏繞咗我好耐,究竟可以點樣解決?

Hello, 理解你嘅困惑同焦慮。性行為係一個涉及到身體和心理嘅過程,對於好多人嚟講,可能會出現一啲困難/焦慮嘅。睇到你嘅焦慮主要嚟自擔心意外懷孕、對陰道感到核突同抗拒同顧及伴侶感受,會有一啲建議希望可以幫到你。

最緊要溝通,同你嘅伴侶有坦誠嘅溝通。同佢講返你嘅困惑同焦慮,俾佢知道你對佢嘅感受同埋對性行為嘅不安。同伴侶共同討論如何解決呢個問題,同埋相互支持理解。

你需要放鬆,性行為嘅時候緊張同焦慮係會導致陰莖無法保持勃起。要嘗試放鬆身體同心理,例如深呼吸或其他放鬆技巧去幫你減輕壓力。

係前戲方面,除左用手或口嘅觸覺刺激對方外,仲可以用視覺、嗅覺、聽覺、味覺呢啲方向去豐富前戲提高性興奮和同激情,都有助自己放鬆同增強你嘅性興奮同性刺激更投入喺性行為當中。對於接受唔到自己嘅手觸碰陰道可以使用性玩具代替,如果唔想見到陰部可以使用陰暗嘅燈光或者熄燈進行。

而係性行為產生痛楚,可能性有好多,例如:用力不當、體位唔適合自己等,所以都要作出溝通,然後大家互相探索一下適合既性行為方式。有時陰道潤滑不足,或者比較緊張嘅時候,可能陰莖插入陰道嘅時候都會造成痛楚,而唔能夠順利咁插入。發生性行為嘅時候配合埋潤滑劑,可能喺比較多潤滑嘅情況下,減少咗磨擦產生嘅痛楚,會舒服啲,而喺過程中,有需要都可以補啲潤滑劑,等成個過程都足夠潤滑。建議使用水性/矽性/水矽混合性嘅潤滑劑;唔建議使用油性潤滑劑,因為油性成分會導致乳膠安全套破裂,亦有機會會破壞陰部健康嘅酸鹼平衡。性行為中好重要嘅係大家都享受同投入,插入唔一定係最重要嘅,有適當嘅前戲同afterplay都好重要㗎!可以更加了解對方嘅喜好、敏感點,刺激身體反應同感受,令身心準備投入性行為,亦都可以建立更緊密關係。

至於安全套成效,係正確同全程使用嘅情況下能夠提供極高嘅避孕及預防性病效果,仍擔心只係用安全套仍然唔足夠,可以考慮同伴侶建議同時使用埋荷爾蒙避孕法,例如係口服避孕藥,或者係避孕針,咁樣就會更加安全啦。