安全套問題

如果性行為途中有戴套,但中途破裂,且破裂時即刻拔出來,中途沒有射精,會有風險嗎

Hello 呢個情況都好難答到你,只能夠講沒有懷孕風險。

因為陰莖處於性興奮狀態嘅時候,有機會會流出一啲透明嘅分泌物,即係尿道球腺液,如果尿道之中有精子嘅話,咁精子就有可能會隨着呢啲分泌物一齊分泌出嚟。如果你係喺插入式性行為途中,安全套破裂,咁呢啲分泌物就有機會會同陰道有接觸,而精子就因此有機會會留喺陰道入邊,從而有機會導致懷孕。

如果擔心嘅話,可以喺性行為之後72小時或者120小時之內食返事後丸。你可以去家計會或者睇私家醫生都可以。因為事後丸喺香港係醫生處方藥物,就一定要睇醫生由醫生開藥開比你先可以獲取嘅。不過事後藥係高劑量荷爾蒙藥物,就唔建議作為恆常避孕措施,最好一個月最多只係食一次。食完之後都可能會有副作用,例如乳房脹痛、不規則陰道出血等等。副作用強弱就因人而異嘅,有啲人會比較勁,有啲人直頭可能冇副作用。

如果已經過咗時限嘅話,就可以喺性行為之後11日用驗孕棒驗孕,得到嘅結果就會準確㗎啦。

至於安全套破裂,都可以留意番會唔會係潤滑不足,或者size唔啱。有興趣嘅話,都可以試吓轉其他牌子,或者選購合適嘅潤滑劑協助,亦都可以喺買安全套之前度下size啱唔啱先。咁樣就可以盡量避免再有性行為途中安全套破裂嘅情況。

希望幫到你哋。

Sorry 第一句係「會有懷孕風險」