擔心懷孕問題和著床出血問題

Hello!

你好,我想問問一星期前發生了性行為,

剛巧在發生性行為的第六天出現尿頻,發生性行為後的第七天早上(預料是月經會到來的日子),我洗手用手指篤入去陰道有血,血很少,不至於流出來,同一天中午時再洗手用手指篤入去已經沒有血,只剩下透明的分泌物,

想知道,早上那些血是不是著床出血,而不是月經前期,因為看你們的文章,出血是發生在性行為的六至九天,而且血量少又有尿頻,其實是不是已經懷孕呢?

我很擔心,麻煩你幫忙解答,謝謝!

P.S. 補充一句: 溫度都是keep 住37.1度…

Hello~想問呢次嘅性行為有無使用安全套,或者服用足夠日數嘅避孕藥?如果擔心懷疑,而家已經可以用驗孕棒,獲取初步結果,到性行為後第11日再測多次,獲得比較準確嘅結果:pray:t2:

的確著床性出血係喺性行為後6-9日,有一塊護墊吸得晒嘅血量。但有尿頻情緒唔足以斷定係咪懷孕,因為除咗懷疑之外,都有機會係尿道炎或其他性病感染導致,又或者緊張或飲得多水,所以最好都係以驗孕棒測試結果為準。

而月經初期正常係會有少量分泌物:raised_hands:t2: 亦可能因為血氣唔暢順(俗稱谷M)而令到唔係持續有血,所以如果聽日或後日有出現返正常血量嘅血,就係嚟咗月經,亦即係無懷孕喇~

Hello! 月經在出現血絲之後第二天來了,不過今次只有二天月經,整個月經只濕透兩塊夜用m 巾內褲,全部鮮紅色,第三天就來了啡色的分泌物,平時是來四天月經的。

所以在性行為的第十二天和第十四天分別用了Ultra Early clear blue 和clear blue 的電子驗子棒跟足說明書指示,結果是陰性,想問還有機會是懷孕嗎?
因為坊間說要在性行為十八天和二十一天驗孕才準確….加上近來有腰酸和嗜睡的特徵…

問題1)我要不要再繼續驗孕嗎?
問題2)那是真正月經還是著床出血嗎?

麻煩你們解答,很擔心…

Hello~我逐條回覆你:raised_hands:t2:

Q1) 我要不要再繼續驗孕嗎?
A1) 現時驗孕結果足以指出你無懷孕,如果你都係唔放心嘅,可以再次驗孕或諮詢醫生:raised_hands:t2: 驗孕原理係檢測尿液中嘅hCG(人絨毛膜促性腺激素)含量,成功懷孕嘅女性體內嘅hCG水平就會持續上升,所以只要係性行為後第11日驗孕,就可以得到準確嘅結果:saluting_face:你喺第12同第14日都驗到陰性,咁都可以放心:+1:t2:

Q2) 那是真正月經還是著床出血嗎?
A2) 應是真正月經:raised_hands:t2:因為着床性出血,多數只有一日,同埋只有散點、少量(一張護墊足以吸收晒嘅)血液,而你嘅份量係遠超着床性出血嘅份量,所以應該係真正嘅月經嚟。

Hello! 不好意思,想請教多一句…

在性行為後第十六天去了化驗所抽血驗孕,結果是陰性,

問題1)請問這結果可信嗎?我仍需要繼續驗孕嗎?
問題2) 想問會不會有機會如果真是懷孕的話,身體未夠時間著床和產生HCG又或者不正常懷孕而連抽血驗孕都未驗到?
問題3)會不會在性行為後第十八天和二十一天會突然驗到有懷孕?

很擔心,請辛苦回答,謝謝你!

Halo 見你都擔心咗好耐呢件事 :smiling_face_with_tear:不過如果只係就以上資料嚟睇,意外懷孕嘅機會都算係好低了。

見你有提到你出去用抽血驗孕嘅方法再做咗次測試,以我所知呢個方法係抽取並測量血液中hGC嘅濃度而判斷有無懷孕(不過視乎化驗室提供嘅資料最準啦)。基本上,呢個方法比起你自己用驗孕棒(尿液測試)更加快得知結果同結果亦都更加準確。所以,如果你兩樣測試都已經做咗,而結果亦都顯示係陰性嘅話,咁基本上都已經好準確你無懷孕。

另外,你之前已經嚟咗月經,即係代表卵子已經排出咗,所以其實有關於著床嘅問題都唔洗太擔心;同時正如同事上面所講,係性行為後11日進行驗孕,所得到嘅結果已經非常準確,所以你如果係你喺第12同第14日都驗到陰性,就已經可以放心。

最後,基本上我都無特別聽過「第十八日或者第二十一日」嘅有關資訊。所以如果係用檢驗hGC作為驗孕方法嘅話,基本上第十一日後做嘅驗孕都已經好準確了。但當然,如果你真係好擔心又好想再check多次,咁你都可以選擇係21日後再用多次驗孕棒。不過當然其實11日後所做啲結果都已經好穩陣。

Hello, 近這一個月在肚臍的左邊有悶痛,有點wing wing 地,肚的悶痛會不會是有機會懷孕的徵狀,子宮要支撐大預備讓受精卵成長?

我最後在性行為後的二十一天用了晨尿和Clear blue 電子驗孕棒去驗多一次,跟足說明書,結果都是陰性。如果是懷孕的話,身體的HCG濃度都是足以夠時間反映在尿液裡面。如果今天的結果都是陰性,是不是已經排除了身體懷孕的問題,不用再繼續驗孕?

十分謝謝你們再回答我!

Hello~如果你都係擔心嘅,都歡迎你繼續驗孕嘅,當買個安心,不過我都希望你明白,只要喺不安全性行為後第11日做hCG尿液檢測,已經可以得到比較準確嘅結果,而血液檢測嘅準確度都更加高,所以如果結果顯示係陰性,就真係無懷孕。

至於你提到肚痛、wing wing哋嘅感覺,同懷孕應該無關係,因為懷孕症狀主要係孕吐、噁心等,我認為你嘅身體反應同你緊張嘅情緒關係比較大,焦慮不安等情緒除咗係心理感覺之外,都會反應喺生理上,所以都建議你向醫生查詢。

Hello! 想請問一下,我不放心,在性行為後第二十三天驗血結果是陰性,在性行為第二十五天早上用晨尿去驗過孕,結果都是陰性,我還到了醫生做了一個婦科檢查,照超聲波,暫時在子宮看不到任何東西,其實是不是已經完全排除我懷孕的機會?

因為在網上見到其他人有些懷孕的婦人,胎兒要等到7至8周不論在超聲波檢查或者血液尿液檢查才發現自己懷孕,

我是不是要繼續憂慮下去?驗孕會不會突然驗到是陽性?

還是之前所做的測試都已經有足夠時間讓身體分泌HCG反映出最準確的結果?

你好啊

見到你喺性行為後第23日同第25日驗孕,再加上已經有睇醫生、照超聲波,驗孕結果係好準確可靠嘅。陰性結果即係代表你冇懷孕。

即使你再驗孕,如果你係冇懷孕嘅,個結果都唔會改變到。

留意到過往都有類似嘅困擾,唔知有無使用安全措施嘅習慣呢?例如安全套、避孕藥等,其實只要正確使用安全措施,避孕成功率都好高㗎!

明白發生性行為後會感到驚同擔心,不如一齊思考下驚嘅係咩?如果真係有咗bb,對你嚟講有咩影響?可能係少咗私人空間?可能打亂咗一啲計劃?依啲影響係咪真係完全無解決方法?如果可以釐清到自己嘅憂慮同恐懼,或者可以令你放心啲。不如試下同另一半討論你嘅憂慮,例如如果真係意外懷孕要點面對,會選擇終止懷孕定係繼續懷孕,或者未有能力𠄘擔可能懷孕嘅風險嘅話,係咪可以暫時停止發生性行為?有共識之後可能都可以令你嘅擔心減少。

無論係咩形式嘅性行為都好,都需要全程使用安全指施,先最有效咁避免懷孕。除咗唔發生性行為外,無一個安全指施可以100%避孕,所以希望可以諗下性行為對你同另一半嚟講有咩意義?性行為喺一段關係中代表住啲咩?大家嘅關係更進一步?除咗準備安全指施外,喺發生性行為前都需要做好心理準備,清楚知道自己嘅意願。

Hello! 不好意思,想請問多一句…

如果在性行為後30天驗血和驗尿的結果,
都是陰性,其實是不是已經可以完全排除我因為一個月前性行為而懷孕…

如果真是懷孕的話,HCG去到性行為30天的這一天不會驗血或者驗尿都驗不到出來嗎?

這樣擔心,始終避孕不是100%,即使當下覺得整個性行為過程好似是沒有問題,但是性行為後出現那次月經剛巧是在性行為後九天,加上血量只有兩天,全個月經只濕透了兩塊夜用M巾底褲,都是血紅色,第三天流啡,平時月經都有三至四天鮮紅色的月經,所以令我害怕是著床出血,…加上最近又有胸漲、肚漲肚悶、嗜睡等等疑似懷孕的症狀,所以才擔心地問多了很多次…亦驗孕驗了很多次…

希望你們不會介意再回答,十分謝謝你們!

Hello, 完全理解你嘅擔心,呢個係很多人都會遇到嘅情況。以下係一啲關於懷孕測試同症狀嘅詳細解釋,希望能夠幫助你減輕焦慮。

驗孕嘅準確性,,血液測試/尿液測試係檢測懷孕最準確嘅方法之一。一般嚟講,發生性行為後11日血液中就能檢測到人類絨毛膜促性腺激素(HCG)。係性行為後30天,如果血液測試/尿液測試結果係陰性,幾乎可以排除懷孕嘅可能性。

月經同著床出血有時候難以區分。不過,著床出血通常比月經出血輕微且時間短,一般只持續1-2日。根據你嘅描述,你嘅出血持續左三日,而且有部分血量較多,比較符合月經嘅特徵。

而月經嘅長度同血量有時候會受到壓力、飲食、生活方式改變等因素影響。即使你今次月經比平時較短,都唔一定表示懷孕。你提及嘅胸漲、腹脹、嗜睡等症狀可以由多種原因引起,包括月經週期嘅變化、壓力、飲食變化等。呢啲症狀唔一定表示懷孕。

總結嚟講,係性行為後30日進行嘅血液同尿液測試結果都係陰性,基本上可以排除懷孕嘅可能性。你嘅月經可能係因為其他原因而變化,呢個係正常嘅生理現象。

謝謝你們十分耐性地回答,原來你們說完後,我已經安心很多。

今天身體突然流啡,大約幾滴和一粒青豆的啡色分泌物,令我又聯想到自己是否懷孕?

因為原定應該是每個月5至6日會來月經,就算經前的流啡都是早數天,大約2至3日,早幾天5月27日(行房30天)才已經驗血驗尿,結果是陰性。這個月都沒有再行房,會不會原來懷孕,但是驗血驗尿都驗不到…還是在我驗血驗尿之後才著床完畢?

為何會有流啡的現象?是不是與懷孕有關?

可否再回答一下,讓我消除疑慮…

另外,想問多一句,如果一直不再行房,其實行房30天,是不是要驗到就一早驗到懷孕,基本上可以排除懷孕的可能,之後應該不是突然再驗到有懷孕?

月經周期受好多唔同因素影響,包括情緒壓力、生活作息,唔係上個月6號嚟,今個月就一定同樣都係6號嚟咁嘅。依加出現嘅流啡可能係經前嘅徵兆,可以耐心等待月經。如果流啡嘅情況持續,亦都可以考慮睇醫生。

最後,正如上面所講,如果你係冇懷孕嘅,即使你再驗孕,個結果都唔會改變到。我地唔係醫療人員,亦唔係最熟悉身體情況嘅人,好難就住唔同身體狀況評估係咪同懷孕相關,唯一客觀嘅標準就只有驗孕,見到除咗驗孕棒外,你亦有去診所驗血,結果都係陰性。不如搵一個你感到放鬆嘅空間,慢慢諗下,點解一直覺得自己懷孕呢?究竟點樣你先可以相信自己冇懷孕?如果一直唔願意相信驗孕結果,相信對你嘅情緒都會造成困擾。如果你唔疏理清楚你嘅諗法,其實我哋提供幾多資訊,不厭其煩地回答你幾多次,可能都解除唔到你嘅疑慮。
見到懷孕風險令你困擾咗咁耐,你都可以考慮同男朋友商量並取得共識,喺你未準備好之前,唔好發生陰道陰莖插入式嘅性行為,甚至唔好發生任何形式嘅性接觸,等你覺得心理上準備好,先再發生進一步嘅行為。