性行為後擔心

我16歲間唔中會同男朋友有性行為,每次都會全程戴套,幾日前指交後有啲血,唔知係插入式性行為嗰陣已經有定係指交之後先有血,我唔知係唔係自己有病定淨係刮損咗,一諗起嗰陣就會唔知點解下腹唔舒服又暈咁,好驚係個子宮有問題,定係純粹腸胃唔舒服:smiling_face_with_tear:都已經有好注意衛生,唔單止全程都要帶安全套,之後都會用紙巾抹同埋去廁所,之前都有啲渣滓嘅分泌物睇中醫話係濕熱,但係我唔夠膽話有個性行為唔知會唔會係因為性行為所致,我亦都知道有時排卵期會出血之類,同埋自己唔定時嘅作息時間都會令自己身體有變化,但一直都好擔心又唔敢同任何人講:smiling_face_with_tear:

Hello, 明白你而家感到擔心同困惑,根據你嘅情況可能係以下嘅原因引致性行為後出血,會有啲建議,希望能幫助你理解同處理目前嘅情況。

首先,欣賞你同伴侶進行性行為過程有使用安全措施(安全套)避免咗懷孕同預防咗性疾病。

第一個出血原因:性行為令到陰道冠有血管的部分破裂,陰道冠(俗稱處女膜)為結締組織,本身就有開孔,讓經血能夠流出。陰道冠亦並非所有部分都有血管,所以即使破裂受損,不一定會出現流血情況。如果性行為過程中,剛好令有血管的部分破裂,導致陰道出血嘅情況出現。

第二個出血原因:性行為(陰道交、指交)後出血好大機會係因為過程中出現摩擦潤滑不足,而令外陰/陰道內造成損傷/撕裂,導致流血嘅,通常都係少許血絲嚟,唔會好多。如果傷口未完全癒合,再發生性行為,都有機會令傷口惡化。一般情況下,過多一陣傷口就會復原自然好番,唔洗太擔心暫時都建議傷口好番之前(大概一星期左右),特別係傷口依然感到痛楚,或者分泌物內依然出現血絲嘅時候,就唔好發生性行為住,避免影響傷口復原情況。

而激烈嘅性行為動作都可能令外陰/陰道內造成破損,所以建議係性行為當中使用潤滑劑。尤其當有使用安全套進行安全性行為嘅時候,潤滑不足有機會導致安全套因摩擦破損,加大意外懷孕風險。關於潤滑劑嘅選擇可以參考返:

https://www.instagram.com/p/B5cf5Z9FCaS/?igshid=1p6e0igkhptit

要注意嘅係因為嘅陰部或者陰道已經有細微傷口,所以呢幾日要做好日常清潔、建議著棉質底褲同鬆身衣物避免發炎,同埋要盡量避免插入式性行為。

如果你發現每次性行為之後都會出血,係確保潤滑度之後都無改善,甚至係平日都開始出現異常陰道出血,都有機會係身體發出嘅警號。有某啲婦科狀況,例如子宮頸發炎或者糜爛,都有機會導致性行為後出血。如果情況持續,我哋都建議搵婦科醫生做詳細檢查去確認身體嘅狀況。建議係打電話預約睇醫生時,可以同護士講你出血嘅情況,睇下護士建議你出血時就可以睇,定係要等停血先。

至於分泌物方面,正常嘅分泌物應該係無色無味嘅,唔會出現渣狀。如果分泌物出現黃綠色嘅情況,有機會係暗示陰道出現咗細菌感染嘅問題。如果發現分泌物有魚腥味,同埋係蛋白豆腐渣狀,或者陰部出現痕癢灼痛嘅情況,咁就要盡快睇醫生啦。

而排卵期出血會係血絲狀,顏色則以咖啡或淺粉色為主,可能有蛋白狀分泌物,血量都會好少,通常用護墊都足夠大概一至三日就完。排卵期出血係正常嘅生理現象,就如你所講嘅排卵期可能生活節奏或習慣改變引發荷爾蒙變化所致,例如壓力、作息、飲食習慣等。