我同我女朋友29號凌晨做愛
全程有戴套 事後裝水檢查過套冇穿
完全冇想射嘅感覺 冇射入去
淨係做咗段短時間因為佢話痛就冇繼續
中途有check過套冇甩過
不過女方有卵巢多囊 七十幾日冇嚟m
上次嚟m都係隔咗150日 仲要係食藥先嚟到
想問如果想個結果準啲 最快可以幾時驗孕
同埋有bb嘅機會大唔大
加上醫生有開催經藥(norcolut)比我女朋友
如果事後照食 會唔會影響驗孕結果？
依家我女朋友仲係好擔心，想問會唔會有啲咩方法可以令到佢冇咁擔心？
I mean 有啲咩方法可以減低佢嘅焦慮？
hello你好
見到你同另一半喺性行為過程中，有全程使用安全套，依個係好好嘅習慣嚟嘅！避孕成功率高達98%嘅～
明白都會擔心懷孕嘅可能性，你可以喺性行為嘅7日之後驗一次，咁就會有初步結果；喺性行為嘅11日或之後再次驗孕，就可以得到更準確嘅結果。因為hCG嘅分泌會隨著懷孕嘅日子增加。所以你於愈後嘅日子驗孕，就會因為體內嘅hCG會愈多，而愈容易得到準確嘅驗孕結果。
norcolut含有黃體素，唔會影響驗孕結果嘅，不過唔放心嘅話，都可以去診所驗孕，通知醫生有關另一半嘅身體狀況～
見到另一半喺性行為過程中感到痛，有啲方法可以幫助對方減輕痛嘅感覺嘅，做嘅時候要注意要等陰道足夠放鬆，先至插入去，唔好夾硬嚟。同時可以用手指幫咗對方先，等足夠濕潤嘅時候先至插入去。另外，你都可以配合潤滑劑，不過要留意油性嘅潤滑劑係唔可以同乳膠嘅安全套一齊使用嘅，因為會增加破裂嘅機會。同埋做嘅時候都可以郁得慢啲，唔好咁激烈，減少磨擦得太犀利，咁就可以減少被整痛嘅機會。
最後見到你都好擔心對方嘅情緒，除咗唔發生性行為或者結紮外，無一種安全措施可以100%避孕嘅，就算幾小心都好，都係會有懷孕嘅風險，所以可以放鬆啲。明白你好愛女朋友，好保護佢，但雙方嘅溝通係好重要嘅，講清楚自己嘅感受，如果真係有咗bb，對你嚟講有咩影響？可能係少咗私人空間？可能打亂咗一啲計劃？依啲影響係咪真係完全無解決方法？如果可以釐清到自己嘅憂慮同恐懼，或者可以令你放心啲。不如試下同另一半討論佢嘅憂慮，例如如果真係意外懷孕要點面對，會選擇終止懷孕定係繼續懷孕，或者除咗插入式嘅性行為外，可唔可以改為一啲低風險嘅性行為（例如指交、口交、互相自慰等等）。有共識之後可能都可以令你地嘅擔心減少呀！