服用事後丸後擔心失效

係5月31日發生性行為後,發現保險套的下方漏出精液,由於不清楚是否遺留在體内,加上正處於排卵期,所以我和男友立刻前往私家醫院配事後丸(postinor 2- 750microgrsms tablets levonorgestrel)。
服用事後丸的時間是性行為後的2個多小時,過程並沒有任何副作用,只在翌日有些疲倦和肚瀉。(已過12小時)

我有幾個問題想問:
1)在排卵期服用事後丸是否會失效?因為我在網上查看資料時有些資料指在排卵期服用事後丸會失效,我十分擔心。

2)網上資料指服用事後丸後幾天會出血,但直至現在已經過去五天,仍未見出血,是否已經形成受精卵並已經著床?

3)在服用事後丸的數天後小腹位置有些悶悶的感覺,是否事後丸帶來的影響?

麻煩大家了,感激不盡。:crying_cat_face::pray:t2:

Hello​:smiling_face_with_tear:

Hello, 欣賞你同伴侶發生性行為有使用安全措施(保險套),正確使用保險套避孕同預防性疾病效果都極高,逐個回應你嘅三個問題先。

1)事後丸係排卵期服用都係有效嘅,事後丸有分性行為後72小時或者120小時內服用兩種,兩種事後丸最好嘅做法係性行為後越早服用越好,以增加其有效性。你係性行為後2小時就服用事後丸已經發揮到避孕功效,唔使擔心。都講解下事後丸嘅原理喺透過高劑量的人造荷爾蒙抑制排卵或干擾受精/著床過程,令女性嘅分泌物增加、又或者令子宮內膜變厚,從而令精子唔容易著床。

2)食完事後丸之後2至7日可能會出血,岀血原因係子宮內膜剝落所導致既,即使有排卵,都可以令受精卵跟住內膜一齊排出,避免懷孕,但唔係所有人都會有呢種反應。

而係懷孕初期出血又叫「著床性出血」係指當受精卵着床喺子宮壁嘅時候有機會造成嘅少量出血,通常只會有幾滴或者最多一塊護墊可以承載到嘅血量,而且係一次性,通常只會一日內一瞬間流完,唔會持續地出血幾日,血嘅顏色亦會同月經嘅唔一樣。一般由受精到着床大概係性行為後六至九日就會發生。而着床性出血並唔係一個常見嘅現象,即使真係因為懷孕都係只有少部分女性會出現嘅情況。

如果唔放心嘅話,都可以喺性行為之後嘅7-11日驗孕。如果想買驗孕棒驗孕嘅話,我哋都建議去返一啲信譽良好藥房或者大型連鎖個人護理商店,買番啲可靠嘅牌子嘅驗孕棒驗孕。一般7日之後嘅話就會有初步結果, 11日之後就會有準確嘅結果。你都可以買多一個牌子,去對比下結果,如果都係陰性嘅話,咁就可以放心係冇懷孕。

3)小腹位置感到悶悶嘅感覺可能係事後丸帶來的副作用之一,但這種感覺也可能是由於其他原因造成的。而你提到嘅小腹位置感到悶悶嘅感覺係屬於常見嘅事後丸副作用,另外其他副作用包括覺得頭暈、胸痛、有痘痘、提早/廷遲來經等等。而副作用一般會喺1-2日之內消散。並非每一個人服用完事後丸都會出現明顯嘅副作用,所以食完之後無任何反應都係屬於正常嘅現象,藥物依然係有發揮藥效,無需太擔心啊。如果不適持續或加重,建議向醫生咨詢以確定原因。

謝謝你:laughing: