插左入去但無射

生理期完咗之後第八天做咗無用condom冇射有冇風險需唔需要食避孕?

做完之後開始有啲心情低落同埋肚痛唔係好舒服係咪正常?定係我準備嚟M?

你好,按你咁講你係想利用安全期發生性行為去避孕。
不過坊間所講嘅安全期係以一個週期28日去計算,而一個週期係由嚟月經第一日直到下一次嚟月經前一日為止。係一個28日週期之中,安全期嘅計算係假設咗身體會係第14日排卵,所以週期嘅第1-7日以及21-28日,亦即係所謂嘅月經前7後7日會係所謂嘅安全期。
但係安全期並唔可靠,原因係唔係每個人嘅週期都係28日。即使係28日週期嘅人都唔一定係第14日排卵,要去到月經出現我哋先可以計算上一個週期係幾長,再大概估算上個周期嘅排卵日同安全期係幾時,唔能夠係未出現月經就單憑計算日子準確知道係幾時排卵。而且,有啲週期較短嘅人甚至會係月經期間或月經月結後就排卵,而精子進入體內最長可以生存3-5日,如果咁啱遇上身體排卵,就有機會造成懷孕。所以你既情況並唔係一個安排既避孕方法。如果真係擔心嘅話,可以係性行為後72或者120小時內去家計會或者睇家庭醫生食事後藥,不過如果性行為後已超過120小時,食事後藥就已經無效。
如果要確定冇懷孕風險你可以選擇自行驗孕 ,你可以喺發生性行為嘅第七日開始第一次嘅自行驗孕。自行驗孕可以喺性行為後第7日或第11日進行,因為驗孕棒係透過檢測尿液中嘅hCG (人絨毛膜促性腺激素)含量,呢個激素會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果,而係11日後或者預計經期嘅日子驗孕結果會更加準確。