我未嚟M唔知點

我原本應該係26號嚟M嘅但有時侯都唔係好準時,但絕大部分係早咗到,但我今個月6號有過性行為啦,口交咗同埋有着底褲磨咗兩吓,插入嘅時候全程有帶好安全套,而且佢射之前連套一齊拎出(即刻佢射係冇喺陰道裏面,只係連射嘅時候拎出嚟並且射喺安全套入面)但係我照計應該26號嚟M但我遲咗幾日都未嚟,我喺月經當日驗咗佢係冇嘅(我跟住嗰個說明書話月經當日驗)但係我而家都未有月經我嚴重焦慮,失眠咗好多日,想問下使唔使再驗多次定係點:woman_facepalming:t6:,我亦唔知係咪好安全囉,亦唔知應該點樣可以排解呢位焦慮感,我月經一唔到就勁不安

Hello你好啊 感受你嘅不安啊:face_holding_back_tears:

睇翻你6號嘅性行為,懷孕風險都係相對地低嘅,因為你哋全程使用安全套,見到你都係性行為20日後進行過驗孕,結果已經好準確㗎啦!如果你仍然感到唔放心,可以再進行一次驗孕,相信會令你更安心。

好多唔同嘅因素都會影響月經週期嘅,例如作息習慣、情緒、體重變化等等,見到你提到最近都有失眠、壓力大嘅情況岀現,的確會影響到月經週期,未必係預期嘅日子嚟到。

當排除咗懷孕嘅因素後,可以耐心等待月經,但如果月經比起預期日子遲咗3星期或以上,可以考慮睇醫生,了解身體狀況。

喺等待月經嘅依段時間,你可以做一啲令你感到放鬆嘅事情,例如做運動、見朋友等,情緒對身體都好大影響㗎!又或可以諗下你擔心嘅到底係咩?如果真係有咗bb,對你嚟講有咩影響?可能係少咗私人空間?可能打亂咗一啲計劃?依啲影響係咪真係完全無解決方法?如果可以釐清到自己嘅憂慮同恐懼,或者可以令你放心啲。不如試下同另一半討論你嘅憂慮,例如如果真係意外懷孕要點面對,會選擇終止懷孕定係繼續懷孕,有共識之後可能都可以令你嘅擔心減少。

好多謝你嘅回覆,雖然令我安心唔小,不過唔知點解呢個月個子宮位有種奇妙嘅感覺,就好似俾嘢踢咗一下又或者好似腸蠕動咁 勁奇怪:woman_facepalming:t6:但終於就係點都唔嚟月經,我從來都未試過咁所以好擔心,亦唔知驗孕要幾多日先會比較準確,因為驚Hcg值唔夠驗唔出

Hello, 你嘅情況懷孕風險極低,唔使太擔心~ 就正如我地同事所講你同伴侶全程使用安全套,以及驗孕結果為陰性,即係無懷孕嘅。

補充返驗孕原理同時間,驗孕棒係透過檢測尿液中嘅hCG (人絨毛膜促性腺激素) 含量,hCG會係受精卵著床後開始大量分泌,而一般受精著床呢個過程需要6-9日,所以係性行為後7日使用驗孕棒的話會有初步嘅結果。而係11日後或者預計經期嘅日子驗孕結果會更加準確,所以你驗孕顯示「係冇嘅」,即係陰性,就代表係無懷孕架啦。

至於月經周期會受到好多因素影響,最常見嘅情況/情緒例如焦慮、壓力、擔憂、緊張都會影響到荷爾蒙水平,從而影響到月經周期有變動嘅。建議你先嘗試放鬆心情,調節好作息時間同飲食習慣,都有助維持月經嘅規律嘅。