好擔心,仲未黎m

係6月4號果日發生性行為,
射完先發現個套穿左,
之後三個鐘內去左家計會食事後藥,
當日無嘔亦無不適。

對上一次黎m係5月17號,平時黎m前會有胸痛,
今次臨近黎m都有胸痛,下面又有少少流啡色野,以為係想黎m,因為之前都試過係咁,但今次流左兩三日又冇左,之後到而家都仲未黎m,
個胸又一直keep住好痛,好似仲谷緊m既feel咁,
好幾次覺得下腹有不適以為會黎m,但都係冇

好擔心係咪個事後藥失效:smiling_face_with_tear:
未試過遲咁多日都未黎m

Hello @selena , 唔駛咁擔心先,事後藥一般都係越早食越有效,你係性行為三個鐘內就食左,已經好快,成功避孕率有98%。事後藥係利用高劑量既女性荷爾蒙黎干擾體內原本既荷爾蒙濃度,從而抑制或者係延遲排卵,降低卵子受精既機會。服食事後藥係有可能會影響下次黎月經既日子既,如果你宜家feel到谷緊m,有機會過多陣就會離m。真係好擔心既話,都可以考慮驗孕,係性行為7日後驗只會得到初步結果,11日或以後驗出黎既先較為準確。

琴日同今日朝早都驗左,真係中左
而家好徬徨:pensive:

唔知係唔係因為果時撞正排卵期,
所以食左事後都冇用

你好啊
相信依一刻嘅你感到好混亂,唔知下一步應該點做。意外懷孕嘅時候,大概有幾個方向可以考慮 1. 選擇生育;2. 領養服務;3. 寄養服務;4. 終止懷孕。喺做依個決定前,可以同身邊信任嘅人,例如伴侶、家人、朋友傾下,又或者)去同社工討論應該點樣面對呢個處境,同埋點樣嘅處理方式會比較適合當下自己嘅狀態(例如身心狀態、財政能力、成長階段等)。而意外懷孕嘅情況,亦不限於後生女,無論任何女性(例如年紀較大、已婚)亦會有機會出現意料之外嘅懷孕情況 。

可以喺以下依個post了解多少少關於意外懷孕:糖不甩 Sticky Rice Love on Instagram: "一直以嚟擔心意外懷孕嘅查詢有好多,而係最近我哋留意到有好多疑問關心女性有性行為後幾時會(可以)知道自己有否懷孕,同如果意外懷孕嘅話可以點處理。今日我哋就簡略地講解一下: 受精卵係子宮著床後體內嘅孕激素 hCG(人絨毛膜促性腺激素)會迅速上升,驗孕棒嘅原理就係透過檢測尿液中嘅hCG水平。一般嚟講,最快係性行為後7日已經可以用驗孕棒驗孕,會有初步嘅結果。因為受精卵著床大概需要11日,所以係性行為起計11日或之後再驗一次,結果就會更可信,而係預計月經嚟嘅日子去驗就會更加準確。至於點樣去做,大致上係將尿液完全沾濕測試區,然後等待一段時間,再睇結果。唔同牌子嘅步驟同等待嘅時間都可能有少少唔一樣,所以最緊要係跟返盒內嘅說明書去做。相信大家最緊張嘅都係結果,而要留意嘅係,必須要係見到有一條線先代表今次嘅測試有效,如果結果位置係完全無任何線條出現,咁呢個測試就係無效㗎啦。 一旦意外懷孕,可以選擇(1)繼續懷孕,自行/同伴侶一齊撫養(2)繼續懷孕,透過 母親的抉擇 為小孩尋找領養家長,(3)終止懷孕。 如果選擇終止懷孕,要係香港合法地進行手術,必須先經兩位醫生同意確認「繼續懷孕」對孕婦 或 嬰兒 嘅身心構成嘅威脅比「終止懷孕」大。 手術亦只能夠係香港法例「指定嘅醫院或診所」進行,包括家計會,並由註冊醫生負責執行。因為唔係所有醫院都可以進行,加上需要先經過詳細檢查同確保當事人適合進行終止程序,一般人都唔係可以即時進行到手術。而為咗保障孕婦嘅安全,香港衛生署指引提到除非為咗孕婦生命安全著想,否則必須係懷孕24週之內(大概5-6個月)進行終止,而家計會終止懷孕服務嘅標準就係懷孕10週之內。懷孕週期越長,手術嘅風險就越大。 終止懷孕可以透過藥物或者進行真空吸引手術進行。 藥物:使用會刺激子宮收縮嘅藥物令胚胎組織排出體外。因為毋須麻醉,對子宮傷害較細,風險亦相對較低。除咗藥物可能有副作用,另一個缺點係有機會未能完全引流,需要進行手術去完成流產。 真空吸引術:將胚胎組織吸出體外。過程需要局部或全身麻醉,雖然完全成功嘅機會率比較大,但對身體特別係子宮嘅傷害亦會比較大,術後需要多加休養身體。 人工流產有機會引起唔同嘅併發症,過程中亦可能出現唔同形式嘅情緒困擾,呢項決定並唔係坊間所想像咁輕易,但懷孕女性係絕對擁有自主權去做決定。每個人都有自己嘅故事,旁人永遠無法完全經歷或感受,因此,一旦孕婦決定終止懷孕,尊重、支持同理解比起質疑同批評,對當事人來講更重要,亦係友善嘅表現。 如果懷疑/已確認自己意外懷孕,除咗可以搵我哋,亦可以向 母親的抉擇 @motherschoicehk 或 青躍 @teenskey_official 尋求協助。 我們,一直都在。 參考資料: 香港家庭計劃指導會-終止懷孕 https://www.famplan.org.hk/zh/our-services/clinic-services/termination-of-pregnancy/content 衛生署 家庭健康服務-人工流產 https://www.fhs.gov.hk/tc_chi/health_info/woman/15673.html"

假如考慮梗終止懷孕,係到想分享多少少關於成個流程係點嘅,你都可以了解多啲:
喺家計會進行終止懷孕的話一般都會需要進行至少3次到診:
第一次:由醫護人員了解身體狀況、檢查身體、評估懷孕週數、講解可做的選擇和講解避孕方法,會見輔導員進行情緒支援、了解受助者意願同選擇。
第二次:受助者做出決定,進行轉介/終止懷孕醫療程序,輔導員提供心理輔導
第三次:術後覆診
按照受助者情況,覆診次數都會有所不同。收費方面大概需要合共$4400-6100,排期時間需要2-3星期。不過,因為求助者人數眾多,排期時間有機會要更加耐都唔一定。而如果受助者身體情況唔適合喺家計會診所進行手術,家計會會轉介去公立或私家醫院。
關於喺家計會進行終止懷孕嘅詳情同埋收費,可以留意: 終止懷孕 - 香港家庭計劃指導會 1
根據「香港合法墮胎條例」,申請終止懷孕嘅當事人要經兩名醫生證明其正在懷孕,而且繼續懷孕對孕婦生命構成嘅生理或心理損害較終止懷孕大 (參考資料: https://www.famplan.org.hk/zh/health-info/unplanned-pregnancy 6) 3 。
家計會提供藥物及手術終止懷孕,假如就診者流產當天的胎齡超過10週,就唔可以喺家計會終止懷孕,所以我地都建議可以盡快預約,如果另一半係26歲以下,就需要懷孕女士打電話去青少年保健中心進行預約。
-灣仔青少年保健中心預約電話:25754799
-旺角青少年保健中心預約電話:27704994
-葵芳青少年保健中心預約電話:24432773
至於需時幾耐,都需要睇當時情況。約期後,家計會職員會先初步評估求診者,合適人士會再轉介醫生,作進一步評估及預約手術期,如果一齊順利,大概會喺一個月內完成成個流程。喺確認懷孕後,建議盡早預約,可以喺胎齡10週以下進行程序,可以選擇風險較低嘅藥物墮胎。進行程序當日,需要換上手術袍,服食藥物,亦都會一直監察住你身體狀況,會岀血,可能會有發冷、想嘔等唔舒服嘅感受,一般來講假如朝早去到嘅話,通常夜晚就可以出返嚟,如果比較晏去到或者可能情況較複雜就可能要留醫一晚。

最後希望你唔好責怪自己,無論你做嘅決定係點,需要明白到無一個決定係錯嘅,你已經盡咗最大努力,喺發生意外後盡快補救。雖然意外總都係發生咗,但社會好多資源幫到你嘅,依條路有好多人陪住你,你絕對唔係得自己一個人,有需要嘅話,可以whatsapp/signal糖不甩 (6077 3941),或者向母親的抉擇、青躍、家計會尋求協助 。我地一直陪伴住你啊🫶🏻