應該點調整心情?

同男朋友一齊咗一段時間,覺得自己都ready好同佢去stage 5,但係試咗幾次都唔成功
一係我太緊張入唔到,一係佢太緊張就好快出咗
平時stage 4互相幫對方嘅時候都冇呢個問題
結果次次試完都變咗喺度安慰大家咁
請問可以做啲咩改善到?同時好擔心佢會唔開心 對性有陰影

Hello 明白已經想去stage 5,但係唔成功,都可能令到你哋會緊張同擔心。

不過首先想同你哋講,其實你哋呢個情況並唔罕見,好多人發生插入式性行為嘅時候都會有呢個情況。尤其是可能因為太緊張,都係會影響到肌肉變緊,亦都會影響表現,或者令到更加容易射精,呢啲都係好平常。你哋兩個都唔需要太過怪責自己。

如果係太緊張入唔到嘅情況,都可以增加前戲部份,配合輕鬆嘅氣氛,盡量減輕當時緊張嘅情緒。另外,亦都可以考慮選購適合嘅潤滑劑,增加潤滑程度,都可以幫助到插入時冇咁難嘅。

日常嘅時候,都可以嘗試自己用手指插入,因為對身體嚟講,無論係手指定係陰莖都好,都係屬於異物嘅一種,身體本身就唔習慣有異物插入。所以日常嘅時候,都可以試吓自己用手指慢慢咁用適當嘅角度咁插入去,嘗試令身體習慣,同時都可以自己摸索一個自己習慣嘅方式,慢慢入一隻手指,之後再增加上去,係可以慢慢令到肌肉習慣。咁之後都可能可以令到陰莖插入嘅時候冇咁緊。

不過都提醒返,記住用手指嘅時候都記得要係清潔嘅雙手,同埋唔好太用力,避免整親自己。

希望幫到你