安全期會唔會有左?

如果經前3/4日有性行為,抽出冇內射,懷孕機會高嗎?話說我上一次月經係10/6,平時27/28周期,4/7有性行為,月經預計係呢一兩日

Hello @Apollo , 無套插入就算無射都已經會有懷孕既風險。因為當男性性興奮既時候,就會開始分泌尿道球腺液 (precum),就算你插入前抹走左都好,都未必排除係體內就無分泌,而當中已經有機會含有少量精子。雖然相對精液黎講,佢導致懷孕既機率會比較低,但只要性器官有直接接觸,就會有意外懷孕既機會。

唔知你發生性行為既確實日期,如果仲有時間,可以去食事後避孕藥。係香港,事後避孕藥屬於醫生處方藥物,唔適宜自己配藥。佢係利用高劑量既女性荷爾蒙黎干擾體內原本既荷爾蒙濃度,從而抑制或者係延遲排卵,降低卵子受精既機會。一般事後避孕藥分72 / 120 小時內服用呢兩種。如果需要120 小時事後藥,可以先聯絡診所或家計會青少年保健中心先,睇下佢地會提供邊種時限既事後藥。另外,再緊急啲去急症室求診都得。

如果考慮驗孕,係性行為7日後驗只會得到初步結果,11日或以後驗出黎既先較為準確。

7月4日性行為, 預計今日或者聽日嚟m
(即經前4日做)咁樣算唔算安全期?我一向27/28 周期…
就嚟120小時….食唔切事後
某大牌子(超早知)驗孕棒…計落我預計月經日子,可以而家用,佢話準確度99%
我一陣去驗
你哋話要七日/十一日後先驗,咁即係?

驗完negative ,但period 仲未黎,
再岩岩趕去家計會食120小時果粒
我應該幾時再驗就可以確定呢?

Hello~

首先想分享多少少有關安全期嘅資訊,絕對唔係一個有效嘅安全措施,因為經期係好多唔同因素影響,並唔係每個人都係28日為一個月經周期,亦都更加唔係每個人都係第14日就排卵,除非每日用排卵紙或者搵醫生幫我哋檢查,好難真係可以好準確咁推斷自己嘅安全期或者危險期係幾時。

上面同事提到喺性行為7/11日後進行驗孕,驗孕棒其實係透過尿液測緊hCG嘅水平。咁咩係hCG呢?就係如果真係懷孕,當受精卵著床,身體就會分泌嘅一種荷爾蒙,而hCG嘅分泌會隨著懷孕嘅日子增加。一般來講,7日已經會有足夠嘅水平可以檢測得到初步結果,11日之後就會有好準確嘅結果。

正如上面所講,月經週期會受到好多因素影響而浮動,所以預期月經日子,其實都係根據過往月經週期長度去作出嘅估計嚟,唔係一定準確嘅。

見到你都係有效時間內去咗家計會服食避孕藥,所以都想喺度分享多少少關於避孕藥嘅資訊,因為事後藥係高劑量嘅人造荷爾蒙,所以一般可能會 可能出現噁心、嘔吐、腹痛、疲勞、頭暈、乳房脹痛或頭痛,月經都有機會提早或延遲,依啲嘅副作用會係服用之後短期內就會消失。

喺食藥後,都有可能會岀現撤退性出血,都可以當係一次月經,食完事後藥後嘅岀血係因為子宮內膜剝落所導致嘅,即使有排卵,都可以令受精卵跟住內膜一齊排出,避免懷孕。

係到都想提醒下,事後丸係唔可以作為常規嘅避孕方法,只可以作為一種補救措施,一個月經週期只可以食一次,一年唔可以食多過三次。且其避孕有效性遠不如其他規律使用嘅荷爾蒙避孕法(如避孕藥)。而喺服用緊急避孕藥之後,呢個月經週期剩餘嘅時間,同埋之後嘅日子,都一定要使用其他高效嘅避孕方法先可以避免意外懷孕,從而保護自己。

麻煩晒咁詳盡解釋
我想知咁即係我今日驗孕結果係咪已經可以去致確定冇懷孕呢? 話說預計今日/聽日會黎m. 如果驗孕棒話預計月經前三日驗都99%準
咁以我咁既情況,個negative 有幾可靠?
因為我仲有少少擔心….過晒排卵期先發生性行為又冇內射又食完事後又驗左
可以做既都做晒….

假如懷念,卵子受精着床一般需要6-9日,然後身體就會分泌岀hCG,驗孕棒就係透過檢驗尿液中嘅hCG,而判斷到底你有無懷孕。

睇翻你7月4號發生性行動,到琴日只有4日,所以建議你可以過多幾日再驗孕,咁就可以有更準確嘅結果。

明白依幾日心情可能好混亂,但正如你所講,你已經食咗事後藥,盡咗你嘅努力為依次意外補救,既然係咁,唯一可以做嘅就係盡量放鬆心情,太大壓力都會影響月經週期㗎!

最後想分享一下,比起安全期、體外射精外,仲有好多可靠、副作用相對細嘅安全措施,包括安全套、事前避孕藥等,都可以有效避免懷孕嘅。