冇套口交問題

以前叫雞都一直有帶安全套做(口交或性交有帶套),然而今次叫雞,同佢做之前都有一齊沖涼,然後上床開始做時候條女突然冇套口交,想問下感染性病機率大唔大?條女啲口水掂到我尿道口(陰莖冇任何其他傷口),會唔會容易感染淋病等等性病?另外做完去沖涼因為地下太滑,仆落地整傷咗隻手,咁樣會唔會有傷口感染性病?

Hello

首先,性病主要嘅傳播途徑透過體液,例如精液、腸液、尿道球腺分泌(Pre-cum)、陰道分泌、血液,接觸過身體比較薄嘅黏膜組織,例如肛門、口腔、陰道,或者傷口就有機會傳播到病毒。

沖涼時受傷亦都唔會導致感染性病,唔洗太擔心。但口交個方面,如果你嘅對象口腔裡面有流緊血嘅傷口或者已經有明顯病徵,或者陰莖有傷口,就可能會有感染性病機會。你可以試下回想返有冇呢個情況。

其實會傳染到性病嘅前提係對方都有性病。但係我哋都唔應該預設左對方從事性工作,就一定會有性病。相反,正正因為對方從事性工作,佢哋好多時都更加着緊自己嘅身體,一來都關乎自己身體健康,二來亦都會影響佢哋謀生。

如果你好擔心嘅話,你都可以去做個全面嘅性病測試,社會衛生科、家計會診所、部分私家診所或者醫療機構都有呢個服務,有需要可以去預約。提返你預約做檢測之前要問清楚需要等待嘅「空窗期」有幾耐,即係距離對上一次性接觸後幾多日做測試會有比較準確嘅結果。通常家計會、社會衛生科會要求3個月空窗期;某啲私家診所提供空窗期較短嘅測試,2星期左右已經可以做。

希望幫到你。