個心好煩唔知點好，本身自己同bf讀同一間學校，因為high dip畢業要揾學校，我就同佢一齊報名，ー齊去interview，我哋興趣都係一樣想做nurse，但都知係難好多人競爭，自問我地成績都唔算好都係中間到啱啱合格咁，我哋都有講過假如我哋冇學校收就諗住做保健員先，之後再報過學校咁，點知前排我有學校收左我，我個下當然係開心，但係bf就冇，自從之後佢就日日都好唔開心，我做女朋友嘅都唔知點好，我有同佢講過今次唔得下次再嚟個，未必一下子就成功，但佢都係唔開心，我話我幫你揾下有咩可報下嚟讀，佢又話唔知，我都唔知點好，佢又話好大壓力唔知前途點咁樣，搞到我日日都唔開心係到喊，我自己又係容易喊，搞到好煩，我唔知可以點做點安慰佢，可唔可以教下我
Hello 喺安慰男朋友之前，都希望你唔好唔記得要照顧自己。見到你都有好唔開心，相信都係因為你好愛佢，好關心同緊張佢，亦都唔知道可以點做，所以先至會咁。
你男朋友可能都係因為冇學校收，同埋唔知之後會點，所以先會咁唔開心。知道你都有努力安慰佢，甚至都有幫佢搵吓有咩可以報，你已經做得好好㗎啦。
不過有陣時人唔開心，就好多嘢都未必聽得入耳，即使係安慰嘅聲音，都未必即刻有用，所以有陣時做到嘅嘢都唔係好多。你可以做到嘅嘢，其實都係陪伴住佢，等佢知道你會喺佢身邊。因為呢刻可能佢自己都唔知可以點做，如果你已經有比過建議佢可以報咩讀嘅話，咁你或者都可以俾少少空間同時間佢，等佢慢慢消化咗先，同一時間亦都可以同佢講，你會陪住佢，有咩需要幫手你都可以支持佢。
記住，你已經做得好好㗎啦！係記掛住要安慰男朋友之前，都唔好唔記得自己都好重要㗎！要先將自己身心都休養好啊！ 
同埋都恭喜你有學校收呢