我8月16號食過一次事後，但琴晚同男朋友無套外射，唔知應唔應該食多一次
上次嚟m係7月29-8月2號，應該過咗排卵期，男朋友肯定冇射入去，但都係有少少驚，唔知好唔好係同一週期食多一次事後
Ps. 平時經期都準，就算該週期食咗事後都唔會遲好多先嚟
你好，由於你16號已食過事後藥，因為事後藥係好高劑量嘅人造荷爾蒙，主要透過1）抑制排卵、2）改變子宮環境而達至避孕嘅功效，你喺食事後藥後嘅岀血係撤退性出血，都可以當係一次月經，食完事後藥後嘅岀血係因為子宮內膜剝落所導致嘅，即使有排卵，都可以令受精卵跟住內膜一齊排出，避免懷孕。而事後藥唔係一個可以長期使用嘅避孕方法，一個月經週期只可以食一次，一年唔可以食多過三次。你今次月經週期內已經食過事後藥，咁剩餘嘅日子就要用更加高效嘅避孕方法，所以唔建議你今次再食事後藥，同埋都鼓勵你同伴侶採用返其他既安全措施作避孕，例如：使用安全套／服食事前避孕藥，都可以係選擇，好過成日擔心嘛！
唔食就唯有希望順利嚟m
我淨係知一個月經週期唔可以食超過一次，今年應該食超過三次，會有啲咩影響？
同埋都決定咗下個月會開始食事前藥，想問下食幾耐先有用？
唔好意思，之前可能同事錯過左你既問題，所以咁遲先再覆返你。
解答返你問題，因為事後丸係高劑量嘅荷爾蒙藥物，所以服食後會擾亂未來一至三個月嘅月經周期，你可以想像如果不停咁擾亂周期，加上長期過度依賴使用事後避孕藥，亦有可能會導致內分泌系統負擔，引起月經紊亂、不正常出血等，間接影響懷孕機率。
至於服食事前藥，係開始服食既頭7天都需要採取雙重避孕措施，即服食事前藥之餘，亦需要使用安全套。因為剛開始服食避孕藥時，身體係未即時建立到避孕能力，而係7日後身體才開始慢慢發揮避孕能力。如果準時食藥唔漏藥，係服食3個月後身體就已建立好穩定既避孕能力。