兩日之前可以精蟲上腦，喺出面接受咗無套口交，而家好擔心會唔會中HIV同其他病。見上網有啲話空窗期係3個月，有啲係大概1個月，應該點做
同性口交會唔會仲大鑊？好驚
而且想問如果衣服與家人的一起洗，會污染其他衣物嗎？
Hello @LittleSean , 基本上口水好難傳染性病，如果你個口無傷口嘅話，機會率好低。而且衣服同其他人一齊洗都無事。當高風險體液，例如精液、陰道分泌物、前列腺液同陰莖、陰道或黏膜組織直接接觸先會較容易感染性病。
多謝你嘅解答，我都約咗抽血去進一步了解自己情況。不過我想問我係接受方（即係佢服務我），咁個機會會唔會大啲定細啲。會唔會食PeP好啲
Hello~ 我哋評估感染性病風險主要睇有無高風險體液(例如血、精液、腸液等) 同黏膜組織有無直接接觸，口水本身唔係高風險體液，所以除非對方口部有傷口並破損流血，否則較難傳播到性病俾你 
至於PEP (暴露後預防性投藥) 方面，係用嚟減低感染HIV嘅風險嘅，但其實無套口交傳播HIV 嘅風險係極低嘅，因為HIV 唔能夠透過口水傳播，而且你而家嘅情況似乎已經過咗72小時，透過PEP 防止感染功效會無咁大～（72小時內開始療程，可以成功阻斷81%以上的愛滋病病毒(HIV)感染機會）
聽你嘅描述風險不大，可以唔需要太擔心
但如果你認為有需要，都係可以服用PEP 嘅 你可以喺私家診所買到～ 事前醫生都會同你做肝腎功能檢查～
謝謝你的解答，咁我想問性病空窗期是多少？
例如HIV，上網睇RNA測試是7天後，P24是4星期，有一些是3個月，應該要點計？
同埋其他性病又應該如何計空窗期？
如果我要確保自己冇事，是否就算4星期check一次後，3個月再要check一次？
非常感激
Hello你好啊
見到你都主動去預約抽血檢查，呢個都係一個好好嘅習慣嚟嘅！
要留意嘅係感染性病之後會有一段時間嘅潛伏期，係呢段時間裏面病毒或者病菌潛伏喺體內唔會有任何病徵。而即使你已經有病徵都好，都需要過一段空窗期，等病毒嘅數量累積多啲，先至可以透過唔同嘅方法檢驗出病毒/病菌。以下就係一啲常見性病嘅潛伏期：
生殖器疱疹（疱疹二型）：約2-5天
淋病：約1-14天
滴蟲：約4-20天
衣原體感染：約7-21天
梅毒：約9-90天
性病疣（椰菜花）：約 1-8個月，平均為3個月
以上嘅時間都係一個平均數值，有好多人過咗呢段時間都未出現病徵，其實都係好正常嘅。除咗要睇你當時接觸到嘅病毒量，仲要睇你本身身體嘅狀況健唔健康。
因為大部分性病嘅空窗期係3個月以內，所以建議可以係最後一次性行為後3個月進行檢查，咁就最全面喇。明白都會擔心自己身體狀況，都可以做性病檢查嘅，以下機構提供免費嘅性病測試，有需要都可以參考下：
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。
好的，謝謝你。
咁如果要求醫，是否要到醫院急症室？定一或是泌尿科？而家都繼續留意自己身體狀況，都仲係好焦慮。
而且我想問包皮炎/龜頭炎同性病的症狀有甚麼分別？因為查過網上圖片，未有很準確圖例。我是包莖的，都有自己反開包皮睇睇有冇問題。
以後也不再一時衝動而接受性接觸了。
Hello, 除咗去醫院急症室或睇泌尿科外，仲有社會衛生科、家計會診所、部分私家診所或者醫療機構能提供全面嘅性病測試服務，有需要可以去預約。提返你預約做檢測之前要問清楚需要等待嘅「空窗期」有幾耐，即係距離對上一次性接觸後幾多日做測試會有比較準確嘅結果。通常家計會、社會衛生科會要求3個月空窗期；某啲私家診所提供空窗期較短嘅測試，2星期左右已經可以做。其實如果有發生過性行為，尤其係高危性接觸（例如無套陰道陰莖交），都應該恆常進行性病測試，了解返自己嘅身體狀況。
至於包皮炎/龜頭炎係指包皮同龜頭嘅炎症，尼啲問題嘅症狀同性病嘅症狀可能有重疊，不過佢地嘅成因同表現方式係唔同嘅。
包皮炎/龜頭炎係由細菌/真菌感染、過敏反應、刺激性物質、衛生習慣不良引起嘅，屬於非性傳播嘅感染引起，常見症狀包括：
- 龜頭/包皮紅腫
- 龜頭/包皮有異味或分泌物（通常係白色或黃綠色）
- 發癢、灼熱感或痛
- 有時會出現潰瘍或裂紋
- 尿道口可能會有輕微嘅刺痛感
有啲性病（例如淋病、衣原體、單純皰疹、梅毒等）都可以引起包皮炎/龜頭炎。屬於性接觸傳播引起，常見嘅性病症狀包括：
- 淋病同衣原體：尿道有異常分泌物（通常係黃綠色），排尿時疼痛或灼熱感。
- 生殖器皰疹：龜頭/包皮上出現疼痛嘅水泡或潰瘍，伴隨著發熱或淋巴結腫大。
- 梅毒：早期可能會出現無痛嘅硬性潰瘍，後期皮疹可能遍布全身。
- 人乳頭瘤病毒（HPV）：會引起生殖器疣，通常係無痛嘅。
見你提及「包莖」嘅情況。包莖會導致清潔困難嘅問題，更易引起發炎感染，而且包皮嘅開口太狹小，都會導致排尿出現困難。喺發生性行為嘅時候，更加有機會出現疼痛感，或者擦傷龜頭嘅情況。尼個情況建議睇醫生，由醫生判斷係咪需要做切割包皮嘅手術。
好的，謝謝你
想再問一問，如果touchwood真係中招，疱疹嗰啲，將內褲與其他人的衣服一起用同一部洗衣機洗會不會傳播？自己上網睇有啲話淨係透過性接觸，有啲就話會。到底邊一種說法才對？
基本上嚟講大部分性病都係透過性行為接觸先會傳染到，不過部份係會透過皮膚接觸而傳播嘅就可能會因為衣服而傳染。
而就皰疹而言，一般都唔會透過衣物而傳染，不過如果係懷疑期間又或者已經確診咗嘅話，我都建議先分開清潔，甚至用手洗會更加安心～
同埋內褲都係貼身衣物嘅其中一種，所以平常就算冇任何特別情況下，喺衛生嘅角度嚟講，如果分開清潔都會較為理想～