昨天跟性工作者進行性行為後，在抽出陰莖時，因為射精後陰莖變小而沒有把安全套連同陰莖拔出來。想問一下，這樣算是所謂「甩套」嗎？會否增加患上不同性病的風險？
另外，如果我去進行檢查的話，最快可以甚麼時候去檢查比較好？
Hello, 你描述嘅情況係「甩套」。關於甩套嘅情況，建議射精後盡快將陰莖拔出，因為過程中陰莖會變軟變細，令到安全套好容易移位，而且拔出嘅時候亦都要㩒實安全套底部周圍確保精液唔會流出/甩套/移位。
至於性病風險，如果高風險體液同你嘅性器官冇接觸，感染性病嘅風險係好低嘅。提一提，會傳染到性病嘅前提係對方都有性病。但係我哋都唔應該預設左對方從事性工作，就一定會有性病。相反，正正因為對方從事性工作，佢哋好多時都更加着緊自己嘅身體，一來都關乎自己身體健康，二來亦都會影響佢哋謀生。
性病係屬於傳染病，不分年齡、性別、種族，一般透過性接觸，不論係性交、肛交、口交或生殖器之間皮膚接觸，就有機會經由血液、精液或其他體液感染性病。具體而言，當高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）就會有比較大機會可以造成性病傳播。而性病一般可以分為細菌型性病，或者係病毒型性病。前者大多數都可以完全根治，而後者大多數未有藥物可以完全根治，但可以控制病情，例如愛滋病，性病疣（椰菜花）。
如果你好擔心嘅話，你可以去做個全面嘅性病測試，社會衛生科、家計會診所、部分私家診所或者醫療機構都有呢個服務，有需要可以去預約。提返你預約做檢測之前要問清楚需要等待嘅「空窗期」有幾耐，即係距離對上一次性接觸後幾多日做測試會有比較準確嘅結果。通常家計會、社會衛生科會要求3個月空窗期；某啲私家診所提供空窗期較短嘅測試，2星期左右已經可以做。其實如果有發生過性行為，尤其係高危性接觸（例如無套陰道陰莖交），都應該恆常進行性病測試，了解返自己嘅身體狀況。
同埋亦都想解釋返，即使你嚟緊做測試發現有性病感染，都唔可以証明一定同呢一次嘅性行為有關。因為性病有潛伏期，而且有啲人感染性病之後並無病徵，有機會係之前感染咗但一直都無發現。所以先會建議要定期做測試。
某啲機構（例如關懷愛滋）有免費嘅HIV同梅毒測試，如果你覺得唔需要做全面測試，只係驗部分性病已經足夠，你都可以去預約。