我同男友30/8晚同31/8早都有進行過性行為。
不過開始時抽插未帶套，過程1分鐘左右，之後有帶返。咁樣係咪會增加懷孕風險？
雖然明白安全期並不是準確，我經期一向都準，預計應該5天後會黎，但都擔心狀況
Hello你好啊
只要發生不安全性行為（性器官有直接接觸），就有懷孕嘅風險。雖然無射精，但係尿道球線液都有可能有精子，懷孕風險比起內射低，但都唔係完全無嘅。擔心嘅話，你可以喺性行為後72小時/120小時去家計會/私家診所求診，睇醫生嘅指導下服食事後藥。
當然如果你喺考慮後唔想服用事後藥嘅話，都可以喺性行為嘅7日後驗孕，可以有初步嘅結果，係性行為11日後驗孕，就會有準確嘅結果咖喇！
見到有提到安全期，係到都想分享少少，安全期唔係一個有效判斷懷孕風險嘅指標，因為經期係好多唔同因素影響，並唔係每個人都係28日為一個月經周期，亦都更加唔係每個人都係第14日就排卵，除非每日用排卵紙或者搵醫生幫我哋檢查，好難真係可以好準確咁推斷自己嘅安全期或者危險期係幾時。
謝謝你的回覆。
最後我都係今朝食左事後丸，72小時內
但都會等7天及14天後用驗孕棒驗一驗
你好！
我係2/9食完事後丸後，9/9就已經黎m，咁係咪等於無懷孕？
另外，想問事後丸會否影響月經遲來嗎？
Hello 如果嚟咗M嘅話，咁就即係代表之前嘅性行為係冇懷孕啦。的確食完事後藥之後係可能會影響到之後嘅月經周期嘅，因為事後藥係高劑量嘅荷爾蒙藥物，可能會早到或者遲到都係有機會。
你好！
承上
我9/9黎左m，14/9黎完；跟返正常經期理應10/10個星期會黎m，但仲未黎m
而我係10/10有發生過性行為，全程做足安全措施，做用安全套、無穿無成；而我分別係17/10、18/10、20/10、22/10同24/10都用過唔同牌子既驗孕棒驗過，都係1條線，咁應該理論上都係無懷孕
因為我係第一次食事後丸同第一次咁遲都未黎m，就算遲都可能遲一星期左右，所以個人好焦慮
明白好多時身體狀況，因為我哋肉眼睇唔到，而且未能夠完全清楚掌握，所以都會帶嚟好多嘅憂慮。但正如同事所講，事後藥係一啲高劑量荷爾蒙嘅藥物，所以係會影響到之後嘅週期。有啲人會係早到或者遲嚟，呢啲都係正常嘅副作用。所以即使係遲嚟，又加上已經驗過幾次孕，結果都係陰性，咁就可以係好肯定係排除咗懷孕風險，再加上你之前嘅性行為係有做足安全措施，所以唔需要太擔心。估計你今次月經遲嚟，好大機會都係因為曾經服食事後藥而影響咗今次嘅週期。你可以耐心啲觀察多幾日，同埋放鬆啲心情，情緒穩定 都係增加月經週期穩定性嘅因素之一。