9號6am 同男朋友有性行為但冇用安全套插左幾下冇射，之後晏晝1pm到食左粒事後丸, 去到同日大概6pm又同男朋友再有性行為都係冇用套同埋冇射 
咁樣情況使唔使食多粒事後丸 
大概相隔5個鐘頭
另外奇怪位係唔知粒藥係咪擺得喺個袋太耐，開嘅時候有啲白色粉咁飛出嚟:o
P.s 我上個月大概8月9號-11號嚟m (因為上個月都食過事後丸早咗嚟，今個月未嚟同埋未計到排卵期幾時
Hello, 根據你嘅情況，係9號下午1點已經服食咗一粒事後避孕丸，唔建議重複再食。雖然係當日下午6點你同伴侶再發生性行為，但無射精懷孕風險都係偏低，唔使太擔心。
見你上個月同今次都有食事後避孕丸，提醒返事後避孕丸係醫生處方藥物，所以都想問問你購買既事後避孕藥係咪醫生處方呢？如果係普通藥房購買既咁藥效可能存疑。
如果你好擔心懷孕，可以考慮係性行為後11日進行驗孕。驗孕棒透過檢測尿液中嘅hCG (人絨毛膜促性腺激素)含量，激素會係受精卵著床後開始大量分泌，而一般受精著床呢個過程需要6~9日，係性行為後7日使用驗孕棒的話會有初步嘅結果，而係11日後驗孕結果會更加準確。
至於事後避孕丸打開時有白色粉末可能係藥片受潮或擠壓受損。
事後避孕丸係高劑量嘅人造荷爾蒙，好大機會會影響經期，可能會提早或者延遲，所以月經周期都可能會受影響，下一次嘅月經日期都會受影響。
最後，都想提醒翻，一次月經週期最多可以食一次事後藥 ，建議你同伴侶要溝通之後要做好安全措施，例如使用安全套，事前避孕藥等，避孕成效會高好多。因為事後避孕丸只可以作為一種補救措施，且其避孕有效性遠不如其他規律使用嘅荷爾蒙避孕法（如避孕藥）。而喺服用緊急避孕藥之後，呢個月經週期剩餘嘅時間，同埋之後嘅日子，都一定要使用其他高效嘅避孕方法先可以避免意外懷孕。
咁如果咁樣會唔會影響到藥效 
呢一層都好難講，因為我哋都好難清楚嗰粒藥物受到嘅影響有幾大 