Hello… 我男朋友好似有pregnancy paranoia，而我因為已經諗唔到可以點reassure佢而好frustrated。
男朋友因為好耐之前同佢ex有次pregnancy scare有陰影（當時呢樣野影響到佢地段關係，之後分咗手），所以每一次做完sex之後就會好anxious好paranoid咁好驚我會有咗，跟住就會經常問住我「你嚟M未」「如果未嚟點算」。佢話好驚同我會因為呢樣野而分開。
我其實有同佢講，sex唔係最重要嘅事，要我同佢都ready for it先可以做，如果佢係驚嘅就唔好做。但每次到最後，佢都會因為好想同我有進一步嘅親密接觸而say yes話要做，但做完又會驚又會係咁好擔心我有咗。
我地唔係經常有sex，大概一兩個月一次。8月嗰陣，我為咗reassure佢，我提出食事前藥。
我由7月30號起第一次食21粒事前藥+7粒sugar pills，食藥期間有同佢sex，佢都仲有少少驚但冇之間咁驚。因為我情緒起伏大嘅原因，只食咗一個月就冇再食。我去到食sugar pill嘅第2或3日度（around 8月22號）嚟m，期間血量好少同有少少m痛。
而以我所知，停咗事前藥後一個月，月經係有機會會唔準時嚟。
Fast forward去到9月18號（已經停咗食藥），我同男朋友有sex，全程戴套，已check冇戴反，男朋友亦有掹出嚟體外射精落個套入面。做完之後我地有倒水入個套入面檢查，冇穿冇爛。
佢又再好似之前咁，做完之後好paranoid，因為我到而家（9月25號）過咗一個星期都未嚟M。不過我呢幾日feel到有少少脹氣同好微好微嘅經前痛，但冇以前咁強烈，which我都有同佢講。無論我點樣講點同佢解釋我哋已經做好保護措施，佢都仲係好驚。佢話佢好想要個好certain嘅答案，所以先不停問我，話覺得sex呢樣野令佢好冇把握，佢想對呢樣野有control。
我精神上本身其實好攰，返學讀緊好多科又有份pt，我已經盡晒力比reassurance佢… 我唔知仲有啲咩可以做…
多謝你睇到呢度，希望你可以比啲意見我。
btw其實我唔係唔驚，我身為女仔其實都會擔心，只係冇佢咁驚or諗住呢件事。我同自己講我喺佢面前唔可以show到自己擔心，因為會令到佢更加驚。我嘅諗法係，我好信condom，我地有戴得啱又冇穿又體外射精嘅話，有咗嘅機會其實唔大。而就算真係有咗，我唔介意落咗佢。
我亦有suggest過佢去seek help同啲professional傾吓有冇啲咩方法去令佢自己冇咁anxious，佢話之後再睇吓點。
我地嘅solution係短期內唔再有sex，但我而家未嚟M嘅呢樣野令到佢好驚好擔心，所以我一日未嚟，佢都冇得將呢件事放低。
Hello 睇完你所講，都明白你嘅辛苦，亦感覺呢個係一個心理層面嘅事情，多過係真係事實層面有冇懷孕嘅事情。
首先講返先，的而且確如果你哋發生性行為嗰陣，例如第一次已經有食咗差唔多一個月事前藥，而另一次全程有用安全套，事後亦都有檢查過晒係冇做錯冇問題嘅話，都的而且確懷孕風險係極低，呢方面你都唔使太擔心先。
而且月經周期都會受好多唔同因素影響，例如生活作息、飲食習慣、情緒壓力等等，有時即使遲嚟一兩個星期都係正常嘅，所以都唔建議攞佢嚟做有冇懷孕嘅指標。而且你身體嘅症狀都似係就快要嚟月經，係一啲經前症狀，所以應該都差唔多係時候會嚟M㗎啦。
至於你男朋友發生完安全性行為之後又好擔心會有懷孕，或者你哋可以試吓搵個機會冷靜坐低認真咁傾吓呢個問題。你可以同佢表達返你嘅感受，例如同佢講其實你都希望同對方係親密嘅，但係精神上都好攰，而且其實你都會有擔憂，所以好希望同佢一齊搵個方法去處理，亦都可以鼓勵佢表達佢嘅感受。
同一時間，你可以認真咁問吓你男朋友，等男朋友仔細思考吓到底自己擔心緊張同埋驚緊嘅，具體實際上係啲咩？亦都可以試吓叫佢搵張紙寫低，然後試吓逐點去同佢溝通，睇吓有冇任何嘅處理方法。例如係好驚會懷孕嘅話，咁到底係驚懷孕咗之後唔知點處理？驚會影響你哋嘅關係？定係有啲咩其他嘅擔憂？你都可以同佢講，你係願意同佢一齊去面對呢啲問題，減輕佢嘅憂慮。
至於性行為方面，如果真係未有足夠嘅信心去發生插入式性行為，都可以暫時將性行為嘅重心放喺前戲或者其他形式嘅性行為，例如口交等等。
明白你又要返學又要返工，已經好攰，仲要處理呢個情況都係會好辛苦。呢度想讚吓你先，其實你已經做得好好啦。你有同佢曾經傾過，希望對方真係ready先去做，亦都有提出唔同嘅方法，例如食事前藥同埋認真檢查安全套，呢啲其實都係好好嘅方法去確保減低懷孕風險。亦都睇得出你好堅強同好愛對方，為咗對方而盡量唔去展現到自己嘅擔心，你已經好努力好叻啦。 
不過都記住，呢個都唔係一個即刻處理到嘅問題，可以做到嘅嘢你都已經做咗好多。可能係你男朋友心理上仲有有啲事情要處理咗先，可能要俾啲時間對方，未必可以一時三刻即刻處理到。可以睇吓以上嘅意見幫唔幫到你