星期日時發生性行為 有指交同插入式性行為 動作有啲激烈之後出血 淡紅色然後比較水咁樣 星期一本身已經冇乜 但琴日同今日又有出血 而且量比較多 可以蓋過成塊護墊 想問下係咪有入面有感染或懷孕之類問題
同埋我21號完經期 發生咗性行為 上星期三有食事後丸 但係好似冇乜副作用 而且冇嚟月經 係咪代表冇效
Hello 呢個都建議要好好觀察，有需要就要睇醫生
首先，有時性行為太過激烈，的確係可能會導致陰道出血，不過通常都唔會持續太耐，而且出血量都唔會太多，而且一般嚟講，陰道有自動復原嘅功能，通常三至五日左右應該都會好返。如果真係出血量好多嘅話，咁樣有機會係陰道一直冇好返，就有可能要睇醫生。至於有冇感染，就要多啲留意自己陰道有冇啲咩分泌物，如果出現質地異常或者顏色特別嘅分泌物，例如黃綠色咁樣樣，就好大機會係咁感染咗啦，就要去睇醫生。
不過，都有機會係事後丸嘅副作用，因為你話你上星期食過事後丸，而不規則陰道出血係其中一個副作用嚟嘅，可能會喺食完事後丸之後一個星期出現，一般嚟講持續幾日就會完結。不過都係嗰句，如果出血量真係好多，或者出血持續出現嘅話，其實都唔係一個健康嘅情況，都係建議去睇醫生。
至於擔心懷孕嘅話，只要你有喺性行為之後72小時或者120小時之內食到事後藥嘅話，一般嚟講懷孕機會都好低。而且即使懷孕，正常都唔會有咁樣嘅出血嘅。
至於食完事後藥冇乜副作用，唔代表冇效，因為副作用呢啲係因人而異嘅，每個人身體都唔同，所以好難一概而論，有啲人副作用好強亦都有好多副作用，有啲人就可以完全冇副作用嘅。所以只要有喺限時內食到事後藥，而呢隻事後藥係有經過醫生處方合法得到嘅話，咁相信都唔使太擔心。
如果係月經 啲血量正常但比較似同分泌物混合嘅血是否正常
懷孕出血會有細小嘅血塊嗎
同埋而家好似有少少發燒咁 又喉嚨唔舒服同有鼻水會唔會係懷孕症狀
hello～
相信你提到嘅懷孕出血係指著床性出血，著床性出血係指當受精卵着床喺子宮壁嘅時候有機會造成嘅少量出血，通常只會有幾滴或者最多一塊護墊可以承載到嘅血量，而且係一次性，唔會持續地出血幾日，血嘅顏色亦會同月經嘅唔一樣。一般由受精到着床大概係性行為後六至九日就會發生，着床性出血並唔係一個常見嘅現象，亦都好容易同排卵期出血、陰道擦損出血等情況撈亂。
所以如果血量同平時月經差唔多嘅話，好大機會係月經嚟嘅～
月經有血塊係正常嘅，其實經血同身上嘅血一樣會凝結，所以喺月經期間出現血液凝塊好正常，冇咩需要擔心嘅。從生理學嘅角度嚟講，身體會分泌內部化學物質以幫助血液凝結為血塊，避免血流過多。而一般情況下，月經期間由身體釋放嘅「抗凝血劑」會阻斷血液凝塊，幫助血液排出。但有時當經血流量大，血塊組織嚟不及完全溶解，就會導致血塊嘅形成並喺月經期間被排出。如果血塊嘅數量特別多，咁就需要睇醫生，進行檢查喇
你提到嘅症狀未必係懷孕症狀嘅症狀，如果你真係好擔心懷孕，你可以喺性行為嘅7日之後驗一次，咁就會有初步結果；喺性行為嘅11日或之後再次驗孕，就可以得到更準確嘅結果。因為hCG嘅分泌會隨著懷孕嘅日子增加。所以你於愈後嘅日子驗孕，就會因為體內嘅hCG會愈多，而愈容易得到準確嘅驗孕結果。相信望到結果都會令你放心啲～