如果打咗hpv疫苗，咁感染到嘅機會都係比較細，所以傳染到俾人嘅機會都係比較細。
如果皮膚有傷口有體液接觸到就有機會會傳播。如果只係單純嘅握下手，普通日常交流係唔會傳播。共用床單毛巾而傳染機會都極度極度低。
如果親吻，接吻，或者擁抱呢？
正如上面同事所講，性病主要透過體液傳播，如果性行為過程中冇傷口直接接觸嘅話，呢度都唔使太擔心風險係低嘅。
其實大部分性病都可以透過藥物治療而痊癒嘅，雖然唔係每隻都可以痊愈，但例如淋病、梅毒呢啲都係可以治療嘅，而愛滋病雖然無法根治，但都可以被治療。而且，性病上有個概念叫U=U，意思係當體內的病毒量下降至不可檢測的水平(Undetectable)，這個狀態下，體內的病毒將不能夠透過性接觸傳播予他人(Untransmittable)。所以即使不幸被感染都不至於世界末日，希望都可以減輕到你嘅焦慮。
尖銳濕疣不是會間接傳染嗎？若果潛伏期沒有症狀咁共用毛巾不會傳播嗎？要幾耐先知道自己有冇中？8個月？呢段時間係咪唔可以有性行為？
尖銳濕疣即係性病疣，佢係由人類乳頭瘤病毒（HPV）嘅其中部分型號嘅病毒（主要為HPV-6或HPV-11）所引起嘅，呢個係性病嘅其中一種。
當高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）；或者性器官、黏膜組織或開放性傷口接觸到患者生嘅疣（尤其當疣有破損／發炎流膿嘅時候）先會有比較大機會可以造成傳播。
所以「普通接觸」，例如握手／共用工具呢啲行為係唔會傳染嘅。
而潛伏期方面，通常為1－8個月不等，平均為3個月（參考資料：性傳染疾病 - 香港家庭計劃指導會 (https://www.famplan.org.hk/zh/health-info/sexually-transmissible-diseases) ）；情況可能因人而異，有啲人會比較快出現病徵，亦都有個案嘅潛伏期係1年。潛伏期其實係講緊感染咗病毒幾耐之後會出現病徵，因為個個身體狀況唔同，所以未必感染咗就會好快喺身體見到症狀。
現時未有方法可以完全根治到hpv，但係咁唔代表咩都做唔到嘅，增強免疫力都好重要咖，性病疣（俗稱椰菜花）嘅治療當中，亦需要透過個人免疫系統協助消除病毒，去減低復發機會。
如果發現自己身上有性病疣，可以透過外塗藥物、冷凍治療、進行局部麻醉激光治療等方法進行治療嘅，。即使接受過椰菜花治療，亦可以因免疫力下降或再次感染，使椰菜花復發，椰菜花復發次數會根據患者的免疫系統高低而定，所以可以保持健康嘅生活習慣，維持免疫力，以免復發。
想問hpv/尖銳濕疣會不會有空窗期？查佐好多資料都係的潛伏期，見某醫療中心話1日就可以做hpv基因分型，其他就見到話7-14日？到底係點？我一個月去做hpv基因分型個結果準唔準？如果結果陰性係咪就可以話冇事？
Halo! 正如同事上面所講，HPV都係有潛伏期嘅，不過就因人而異。
至於因為每種測試類型、方式同原理都各有不同，以至佢係科學上嘅準確度都各有差異，所以好難答到你邊一種準唔準，或者邊間啱等等，因為佢地所做嘅嘢都係唔同嘅。測試嘅方案、原理同相關準確度，最好就直接查詢返個啲醫療中心，問多幾間做一做比較就會更好。
我見你由10月中開始都比較緊張同擔心 
如果係同一件事件所造成嘅話，我諗直接去做檢查其實對你嚟講都係好事，至少你唔洗再心掛掛 
但當然唔同plan個價錢都好唔同，所以最好都睇多幾間格下價先。特別你都問左好幾種唔同性病，有啲好似同事咁講，個感染機會低啲，有啲就大啲風險，所以建議你都打去啲醫療中心到做個評估同查詢，搵返最適合嘅選頂！
其實成日咁擔心都好辛苦 
如果可以嘅，都可以諗下做唔同嘅嘢分散下注意力，而唔洗不停咁諗起同一件事呢 
好多謝你嘅回復，一個月30日去驗佐啦（冇事）。其他驗血驗尿嘅都覺得OK嘅。因為呢D冇得呃，同埋呢D技術應該好成熟。就係hpv呢度有D擔心就想問下，我感覺上呢樣測試應該最大嘅variance係點樣攞個sample，同埋就係呢個病潛伏期太長，14日係咪可以攞到有效的sample呢？（比較擔心呢樣，雖然我夠30日）所以我都揀佐有專人幫攞sample嘅地方，做完我都有問如果negative仲使唔使3個月再驗一次hpv。果邊回復都話唔需要，除佐愛滋/梅毒要六個禮拜。社衛都有了解過，但係HSV/尖銳濕疣呢D，冇病徵佢唔會幫你驗，佢要攞上面分泌物/組織去化驗先可以確診。所以宜家都唔知hpv點，係咪淨係可以觀察有冇病症
，過左3個月冇事就冇事？
冇錯呀，如果你已經去過做性病檢測，然後得到醫護人員嘅測試同埋建議嘅話，而你身體之後又冇特別有其他改變或者其他特別情況嘅話，都唔需要太擔心啦。
咁我洗唔洗3個月驗多一次？如果3個月驗，仲要驗D咩？
如果你今次驗過嘅種類都係陰性結果，其實唔需要再太擔心。不過如果結果仲釋除你嘅疑慮，其實你都可以考慮喺三個月後再進行一次檢驗，當中尤其是係hiv/梅毒同埋性病疣，都可以喺三個月後檢查多次。至於其他，例如：淋病/皰疹等，由於佢哋由感染到病發嘅期間時間比較短，所以你今次嘅第一次嘅檢驗結果係陰性嘅，呢啲種類嘅性病就可以好確定係冇受感染，可以考慮唔需要覆驗。
麻煩可唔可以再幫我分析一下
- 對方幫我口交，感染菜花風險低定高？係咪取決於佢口腔內有冇疣體？
- 對方已接種HPV疫苗，幫我做以上1的行為係咪風險會再低少少？
- 一個月驗28種HPV基因分型陰性，係咪感染的風險再比2低好多？
- 想問3個月係計90天？定按月份計3個月（如3月1日去到6月1日）？
Halo 雖然呢到有4個問題，不過我諗可以歸納佢做三個回覆比到你。
首先，無論咩嘅性病都好，因為始終個環境因素同當下嘅情況無人能夠100%準確知道，包括當時人，所以我諗都唔能夠答到你到底係幾多%嘅機會或者邊個高啲低啲咁；同時亦只會令你都好愈諗愈複雜。所以簡單啲講，好似上面所講，只要有高風險體液、黏膜組織、開放式傷口同疣嘅接觸，就會有風險，我地都無辦法答到高啲低啲同有幾高。所以如果有口交，就有機會了，因為就係口腔同性器具接觸。
至於疫苗同檢測方面，咁當然有接種HPV疫苗當然個風險係會低左，但佢都可以作為載體傳染病毒比你。所以正確嚟講係如果你自己本人有接種HPV，你嘅風險就會低咗。至於檢測只係一種了解自己身體狀況嘅方法，並不是減低感染風險嘅方法。
另外，所有測試都係用日數計為最準。所以無錯，多數3個月其實係泛指90日為主。
最後，我都真係明白你有擔心同緊張。不過其實你已經好好咁做哂你可以做嘅事情，甚至做咗好多種唔同嘅檢測，我諗你都已經盡左力了去處理。特別如果你真係好似你上面所講，已經做左好多種唔同嘅付款檢查，其實結果已經非常準確，唔需要再咁擔心。所以比起你再去思考唔同可能性，其實更重要可能係你要處理呢種緊張背後，其實係未仲有其他未被處理嘅問題呢？甚至我之前都有提到，不妨你都分散下注意力，可能直至3個月後，先再直接做一次最準確同全面嘅測試吧。如果唔係，其實你都只係徒添緊自己嘅苦惱，從而影響心情。
好多謝你嘅回覆，你講得啱，D檢測結果應該都準確嘅，其實做完檢測後，本來我都冇咁擔心，心情都轉好佐少少，但係我宜家唯獨就係好擔心hpv呢樣嘢，因為自己冇打疫苗，而且呢樣嘢個潛伏期可以好長，最重要係現時好似也沒有一種世衛認可的方法去驗男性hpv，上網睇佐好多，hpv dna test對於男性黎講好似話會常常有假陰性出現，因為個sensitivity唔係太高？但係個specificity就相對高？經過今次，我上網查佐好多資料，但係有時就係越睇得多就越驚，我唯一好擔心就係傳染俾其他人，如果你話唔會傳染其他人，我會冇咁擔心，我都真係已經唔知可以點做，係揾唔到方法去排除感染椰菜花呢樣嘢，現在只有自責和內疚，淨係希望真系冇事。宜家係咪唯有等到3個月驗，如果陰性就即係冇事？可以完全排除hiv/梅毒/椰菜花感染？
一個月驗嘅時候幫我做test的職員講，如果陰性就唔使再做test，除左hiv/梅毒唔係100%，但係都9成幾。我問過使唔使3個月再驗，佢都話唔使。咁我係唔係可以信佢同個結果？換轉係你哋信唔信？
仲有一點唔係好明，如果對方打佐疫苗，即係佢感染嘅風險係低，如果佢冇感染，如何成為載體再傳畀我？
留意咗好耐，你睇醫生驗埋人哋都話冇事，你問依到職員都係話冇事，咁你都仲唔信，咁你想點？你覺得仲有咩可以做？
唔係我想點，我相信個個上黎問都係出於對自己身體健康的擔心，大家都想冇事。我都唔想為自己增加煩惱，但係事情發生係自己身上，當事人肯定會係最緊張同擔心。我都係想問多D意見，希望大家見諒。
我都有提及過我驗血、驗尿嘅測試我都覺得已經係非常準嘅，始終呢D係驗抗體，過空窗期就一定可以驗到，就係擔心性病疣呢樣嘢。因世衛也沒有approve到驗男性hpv的test，我唔知點解世衛唔approve，係唔係同個準確度有關？但據我所知，hpv基因分型好似係男性唯一嘅方法知道有冇感染。
點解問個感染風險，都係想做個評估，如果風險係低嘅，都會冇咁擔心，不過你哋都話冇辦法評估。
最後我想問以下幾個問題：
-
30天驗完hpv基因分型陰性係咪即係唔會感染hpv/性病疣？90天後再測試結果會更準確定係冇分別？因為佢空窗期話係7-14日。
-
因為呢個病潛伏期可以好長，有冇一個確切日子可以完全排除呢個感染？係咪90天冇病症就一定冇事？定係要觀察到6個月、8個月甚至1年？如果係咁，我係咪呢段期間唔可以有任何性行為？定係唔會有確切日子去知道自己有冇事？
Hello 你好呀
- 首先，HPV有高達150型，如果喺空窗期後驗完hpv基因分型都有機會再感染其他類型hpv。如果喺90日內冇再感染任何新類型hpv，結果都會一樣嘅。
- HPV潛伏期可以高達10年，係冇一個準確數字可以完全排除呢一個感染。