我由10月19開始服用避孕藥，大概服用一個禮拜後開始keep住有啡色嘅分泌物，請問這是正常的嗎？
另外，我今個月正常會去到11月25號先黎m，但這是我第一個月服用避孕藥，剛剛已經食到第一粒白色藥，請問咁我大概會什麼時候黎m? 如果聽日冇嚟M，需要繼續服用所有白色藥物嗎？
Hello, 服食避孕藥後出現啡色分泌物係常見嘅副作用，尤其係啱啱開始服食嘅時候，因為避孕藥會影響體內嘅荷爾蒙水平，導致子宮內膜脫落，可能會產生少量嘅斑點出血或啡色分泌物。呢啲分泌物通常會係幾個月內逐漸減少，除非情況持續或變得更加嚴重，咁就建議睇醫生。
服食避孕藥後嘅月經通常會發生係服食白色藥丸（即係無藥效嘅藥丸）期間。
建議你繼續按規定服食所有嘅白色藥丸，之後再開一盒新嘅避孕藥服食。
如果服食白色藥丸期間無出現月經，唔使過於擔心，因為身體都需要時間建立藥效，所以未必一到白色藥丸就有月經，而且每個人嘅反應會有所不同。當然，如果有任何異常嘅情況，例如持續不規則出血、身體不適等，建議睇醫生。
最後分享返避孕藥嘅原理，避孕藥係通過人造荷爾蒙去抑制排卵，改變子宮頸黏液嘅粘稠度，同埋改變子宮內膜環境，從而達致避孕嘅功效。所以，喺避孕藥嘅影響下，唔會好似平時月經咁，因為身體週期性荷爾蒙變化、排卵、然後未受精嘅卵子連同子宮內膜喺月經期間排出體外；服藥期間出現嘅「月經」其實係「撤退性出血」，即係食藥期間，有荷爾蒙，而服食白色藥丸時，其實冇荷爾蒙成份，而呢個荷爾蒙變化（下降）就會令到子宮內膜脫落，出現出血現象。所以係你食冇藥效嘅藥丸嗰幾日裡面就會嚟「月經」。