同男朋友一齊咗差唔多2年，幾個月前我曾經提過分手，因為佢講大話呃我，俾我發現佢同ex仲有聯絡，甚至有見過面。
我發現咗之後，佢有不斷挽留我，亦都有解釋點解，話係因為ex用自殺嚟威脅佢，佢先會有聯絡，啲對話係為咗安撫佢情緒，同埋嗰次見面係為咗同ex講清楚，之後就冇再見。
我因為心軟，同埋想睇下佢有冇改變，就冇同佢斬纜。呢段期間佢有努力證明俾我睇，佢冇再呃我，包括share gps、有報到去邊，但係我心入面仍然會諗，佢挽留我嘅嗰啲解釋會唔會又係另一個大話。就算佢有改變，我都唔識信任返佢。
當我想同佢繼續走落去，我又會不斷反問自己應唔應信佢，信任問題仍然存在。
當我想放手，我又會覺得好唔開心，因為唔想失去呢段感情。
我應該繼續定放手？
Halo
sorry遲咗覆你，我諗你呢排都應該好苦惱緊到底要點做先好。
我覺得感情問題，講到尾最清楚自己想要咩嘅都係自己，所以最後做咩決定都係要靠自己嘅。不過如果問意見同睇法，我就咁睇你所講，會諗到其實你呢啲內心嘅想法有無同到對方分享？
我留意到自從個次嘅事件後，都係你地嘅關係入面種下咗唔能夠完全信任對方嘅種子。然後因為咁，就算你地做咗好多嘢想改善但你都走唔出比佢呃過嘅想法。我諗呢啲諗法自然都係唔易散去嘅，如果真係想解決，解鈴還需繫鈴人，其實坦白咁同對方傾下你嘅諗法同感受係重要。
特別係一段感情入面，好多時關係就係因為各自好多諗法但唔同對方講而出現更多裂痕
尤其見到你都仲好鐘意對方，咁我諗不如就襯呢個機會都同對方講下你嘅諗法？又比個機會佢都講下佢嘅睇法同感受？
最後啦，誠如我最初咁講，無人可能同你講要一齊定分開會更好。但如果你嘅一啲內心諗法有表達到，而你地兩個亦可以藉此好好認真討論下依家嘅問題。咁自然都會為你地嘅關係帶嚟轉變，你亦會更加清晰自己想做一個咩嘅決定。