是咁的
之前11月9號開始月經
16號比進行性行為嘅時候無套入咗去磨幾下之後出返嚟
之後當日已經食咗事後藥（人係國外所以食嘅係Levonorgestrel）
之後今日下體突然開始流血（類似月經本身嘅顏色但偏啡少少）
Google過話有機會係撤退性出血但都係有D擔心…
Hello~如果你喺發生性行為後72小時內，跟足指示服用事後藥，就有高達97-99%嘅避孕率，所以唔需要太擔心
事後藥嘅其中一個副作用就係撤退性出血，係由於身體嘅荷爾蒙水平明顯下降而造成嘅。佢睇落會接近月經，但有機會血量同日數比平時少啲同短啲，如果你呢次出血有維持2日或以上、血量亦都多於護墊可以承受嘅量，可以理解為撤退性出血造成嘅替代月經（透過人工方法造成嘅月經，而唔係身體自己自然地嚟月經），週期計算上可以當嚟咗一次月經。
你擔心緊嘅可能係懷孕初期或會出現嘅著床性出血，一般著床性出血嘅血量較少，顏色較淺，可能會少至只有一滴血，部分人可能血量會多少少，但血量會係護墊可以承載嘅血量，通常只會一日內一瞬間流完，並唔會似月經咁持續出血，甚至嚟4-5日。所以依你嘅描述，就未必係呢個情況喇：）
如果都係好憂慮的話，可以喺性行為後11日進行驗孕，可以得到準確結果
不過都要提醒返，就算只係輕插幾下，對方係性興奮時分泌嘅pre-cum 都有機會含有少量精子，有一定懷孕風險，所以建議你下次進行插入式性行為前，最好先佩戴安全套，或者事先選用其他安全措施呀