想問下 安全咁用安全套加避孕藥係米安全好多？ 有冇接近100% 安全？
想問下 如果我想食避孕藥 家計會係米有得買、 買之前家計會有冇醫生睇完/講解下先買？
因為我未食過 唔知點樣知自己岩唔岩食
出面睇婦科開既話又好似又要計埋診金。
想知避孕藥 係米要日日食？會唔會有副作用影響我生b b ? 或者變肥？
同埋 如果食左藥加安全套 如果穿左套 仲洗唔洗食緊急？
同埋聽講食避孕藥會即容易致癌？
關於事前避孕藥，其實佢有分兩隻嘅- 單一&混合荷爾蒙- 一般婦女多數用混合荷爾蒙避孕丸，而單一荷爾蒙避孕丸則比較適合餵哺母乳嘅婦女使用。
佢哋嘅基本原理係透過人造荷爾蒙抑制卵巢排卵&令子宮內膜產生變化，子宮頸分泌物亦會變得黏稠令精子難於穿過黏液受精卵就無法著床。即係話就算安全套穿咗，精子都無法著床。
事前避孕藥有分21粒／24粒/28粒裝，都係需要每日準時食嘅，如果食21粒裝，就食21日，停7日；如果食24粒裝，就食24日，停4日； 如果食28粒裝，就每一日都食～
第一次食事前避孕藥，需要係月經嘅頭5日內開始，食咗7日後，就有避孕嘅效果咖喇！但係如果係月經第 6 日或之後先開始食避孕藥，就需要喺食藥嘅頭14日內再配合其他非荷爾蒙避孕嘅方法，例如安全套。
係啱啱開始食藥嘅1至3個月，可能會出現一啲副作用，例如噁心、頭暈、頭痛等，但一般會喺數星期內消失，始終身體都要適應藥效。
食避孕藥後，月經嘅量可能會少咗，因為藥物中嘅荷爾蒙成份稍為減少子官內膜嘅厚度所致，時間上都會準時咗嘅，不過係啱啱開始食藥嘅1至3個月，可能會有不規則出血，依啲都係暫時性現象嚟嘅。
建議喺第一次食藥前睇醫生嘅，因為唔係個個人嘅身體狀況都適合服用避孕藥，例如有心臟問題、糖尿病、高血壓、免疫系統問題、肝臟問題嘅人就通常唔建議食避孕藥，而且市面上有好多唔同牌子/款式嘅避孕藥，每款含有嘅荷爾蒙成份同劑量都唔同，所以建議第一次服用避孕藥之前，要睇吓醫生，等醫生幫你檢查下你嘅身體狀況係咪適合食，同埋適合邊一款藥。家計會/母嬰健康院/某啲私家診所都有提供呢個嘅服務，你有需要嘅都可以去預約㗎。
另外無論有無服食避孕藥嘅習慣，都可以定期進行身體檢查，了解翻自己嘅健康狀況及評估有無需要因年齡、患病或習慣嘅改變而轉用其他較合適嘅避孕方法。
其實新一代避孕藥嘅副作用已經相對地少，正確服食避孕藥係一個安全同有效的嘅避孕方法。長期服用避孕藥唔會造成喪失生育能力，喺停止食藥後，身體就會恢復排卵，有機會受孕。
暫時世界上並無一種避孕措施係能夠做到100%避孕成功率嘅，不過正確使用安全措施係可以大大減低懷孕機率嘅！
只要每日準時食藥，食完藥後短時間內冇屙冇嘔，口服避孕藥嘅避孕成功率已經係可達99.7%（perfect use，完全正確使用），及91%（typical use，一般使用）。除咗無按時間食藥，一般使用包括出現嘔吐等副作用/藥物過期/身體出現狀況等等。