我女朋友已經食咗大約一年事前避孕藥，最近轉季佢唔舒服，之後琴晚佢食事前藥，過咗個半鐘之後佢嘔，請問會唔會影響到避孕藥嘅藥效，同埋使唔使即時補食翻琴晚嘔嘅嗰顆藥？
你好，如果喺服食避孕藥嘅期間，出現嘔吐或肚瀉嘅情況，最好都應該要補食一粒，以免藥丸喺嘔吐/肚瀉嘅時候，未經身體吸收就排走出體外。而你哋嘅情況，如果係今日有嘔吐可以即時或一日內補食返一粒，就會比較穩陣。
但而家冇補食到，而家佢差3顆就完咗21日嘅藥程
佢連續兩日食過一啲西醫開嘅藥而嘔，所以有兩日佢都係食咗事前之後一頭半個鐘就嘔
不過今晚無食西醫開嘅藥，只係食事前藥就冇嘔到
我同女朋友而家應該有咩要注意…
我女朋友應唔應該食多兩日事前藥，將21日藥程食多兩日，以抵銷因為嘔而可能失去嘅藥效？…
Hello你好啊
首先想了解一下你服食梗嘅避孕藥，因為每個避孕藥嘅補食時間都會有唔同，如果係補食時間食翻藥，咁就唔會影響藥效嘅。
建議先閱讀避孕藥說明書嘅指引，有無特別指明服藥後嘔吐的話，咩情況下需要補食藥。如果有的話，可以跟番依照說明書嘅指引處理。
另外，除咗食返藥之外，之後7日內如果要發生性行為都要外加安全措施（即係用安全套），因為俾返少少時間身體鞏固返藥效架。
係gveza 21日嗰款，喺家計會買嗰款嚟，手頭上冇說明書。。。
Hello~ 如果無說明書喺手，咁建議跟返一般漏食避孕藥嘅處理方法：如果服用避孕藥後嘔吐，可以喺原定服藥嘅時間之24小時內補食。假如超過24小時，之後再食多兩日都補唔到㗎，因為身體需要有穩定嘅避孕藥水平，先能夠有效避孕。
聽你女朋友嘅情況，由於藥效好大機會已經受影響，可以直接停藥7日，然後再開新一排，而而家食剩果兩粒可以留作備用，以防第日有類似情況（例如服食後短時間內嘔吐或肚屙）要補食返，就唔怕變咗食少粒而打亂已經建立嘅穩定週期～
由於好大機會已經影響到本身嘅藥效，可以當嚟緊係由頭開始食，亦即係話直至重新服藥14日為止，都要使用額外嘅安全措施（例如佩戴安全套），確保藥效可以完全建立返，咁就萬無一失喇～
最近嘔過會唔會影響嘔之前日子嘅避孕安全度？但之前都係穩定每晚食藥冇任何唔舒服嘅。
同埋suppose下星期日應該重新開藥，咁使唔使睇定呢幾日有冇嚟m，再等到下星期日開藥？
Hello
因為精子係子宮嘅存活期可以長達約3-5日，假如喺嘔之後無補食藥嘅，身體有可能回復排卵。如果發生咗不安全性行為，的確有可能懷孕嘅。 如果你真係好擔心懷孕，你可以喺性行為嘅7日之後驗一次，咁就會有初步結果；喺性行為嘅11日或之後再次驗孕，就可以得到更準確嘅結果。
喺食藥方面，正如上面同事所講，可以當嚟緊係由頭開始食，可以喺下一次經期開始頭1至5日內開始食新一排藥，喺食藥嘅頭7日要使用額外嘅安全措施（例如佩戴安全套）~
明白，感謝各位回答！