我地因為一時衝動而初嘗禁果 仲有幾個月先16歲 件事發生左 去左驗孕(雖然係呢幾日嘅事) 冇懷孕 食埋醫生開嘅事後 雙方家長都冇打算報警 我地都比人鬧醒了 決定將來會結婚 而家好擔心自己同男朋友 心理壓力好大 甚至會想尋死了結自己生命 就算之後結婚都唔會有雙方家長嘅認可 男方家長（單親媽咪）覺得我教壞佢地個仔 破壞人地家庭 我屋企人已經冷靜左 冇理男朋友 focus喺我度先
我同男朋友都肯定唔會分手 唔係單單為左愛 男朋友都想負返責任 唔想逃避同攞完第一次就拋低我 好後悔自己做過嘅野 知道性係關乎2個家庭嘅事 帶黎嘅後果有幾嚴重 之後都唔會再做 真係計劃生育先再做。我想搵人開解 但又唔可以周圍揚 學校唔知道 唔知點算好
Hello 你好啊
首先見你哋提及對於呢件事有罪疚感，亦都後悔發生咗性行為，相信你哋已經好明白呢件事嘅嚴重性，所以我喺呢一度都唔特別再提醒你有關資訊，為你帶來更加多嘅心理壓力
件事始終都係發生咗幾日，你地需要時間去沉澱同消化都好正常，按住自己嘅步伐去諗，有時諗得太遠有可能為自己帶來壓力，所以一步一步慢慢同男朋友計劃未來嘅方向，總會比自己一個憂慮更好，相信有佢嘅陪伴同支持，你都會更有力量
另外都好欣賞你考慮進行下一次性行為之前採取安全措施，而家的確係有好多種嘅避孕措施，我哋都好主張喺了解晒不同避孕措施嘅原理，成效，副作用之後，揀取適合自己嘅。所以你亦都可以透過呢段時間去認識不同嘅避孕措施。當然你有疑問，或者想搵人傾偈嘅時候都可以搵我哋🫶🏻