今日18號同男朋友做咗冇用安全套嘅性行為。其間冇插曬入去，亦都冇射，但係應該有precum 尿道球腺液嘅流出。我上一次經期係1/12-5/12，而家應該係排卵期 。我好擔心，請問係咪應該食morning after pill? 
你好，如果冇使用安全措施下進行性行為，無論有冇射精或完全插入，其實都係有機會有精子進入陰道，所以都係有風險嘅。所以你可以盡快去睇醫生或者到家計會，要求服食事後避孕藥。而事後避孕藥係有分兩種，一種就係喺性交後72小時之內服用，而另一種呢係喺性交後120小時之內去服用嘅。而家距離你哋18號進行完性行為嘅時間，其實已經快超過時限，所以請你務必盡快喺今日或者聽朝早要去私家診所/母嬰健康院/家計會，先見一見醫生然後要求處方事後避孕藥，亦都同時要話畀醫生聽，你哋對上一次性行為嘅時間，即係18號大概咩時間係進行完性行為，然後醫生會決定處方72小時定係120小時嘅事後丸俾你。
但千祈唔好自行去藥房購買事後避孕藥，首先事後避孕藥喺香港係屬於處方藥物，而第二，藥房處方畀你嘅事後藥冇人知道佢嘅成分，又或者係咪一粒真係有藥效嘅事後藥，如果就咁去藥房度配藥，有機會服食咗一啲無效嘅事後丸，從而發揮唔到任何作用。