上個月15/11號係危險期同另一半有無套性行為，但只係好短時間。之後3/12都有嚟M，但血量好少得，嚟咗兩日就完，顏色都係比較淺色。本身一直血量都係比較少大概三四日就完，只係嚟兩日就未試過，擔心會唔會係假月經。因為一直唔放心仲成日覺得頭暈，於是上星期五13/12我有試過用電子驗孕棒驗，但唔係用晨尿，結果顯示係未懷孕，呢個結果係咪準確，已經可以排除懷孕嘅可能？
Hello 呢個情況相信係可以排除懷孕。
首先，你哋11月15號發生性行為，如果冇用到安全措施，咁樣的確係一個高風險嘅性行為，係可能會有懷孕風險嘅。
但係你提到你喺12月13號有用電子驗孕棒驗孕，你又驗到係陰性嘅，即使唔係用晨尿都好，如果結果顯示陰性未懷孕嘅話，都可以相信個結果。
因為驗孕棒嘅原理，基本上其實驗孕棒係驗身體嘅hCG值，如果真係有懷孕嘅話，呢個hCG值會隨着時間而不斷上升，大概去到7至11日左右就已經會有足夠嘅水平令驗孕棒驗到係有懷孕。你個情況對上一次有風險嘅性行為已經係一個月之前，過咗成個月再去驗，如果真係有懷孕嘅話，基本上你用驗孕棒，即使唔係用晨尿都一定會驗到嘅。如果你過咗成個月都仲驗到係冇懷孕，咁個結果已經係非常準確㗎啦。
至於身體同月經嘅情況，你都可以再留意住先。因為月經本身每個月都可能會因為唔同因素而有唔同嘅，例如最近嘅身體狀況、生活作息、飲食習慣等等都可能影響到。至於頭暈，導致呢個情況嘅可能性實在太多，所以都會建議你要好好留意自己身體。特別最近天氣轉涼，頭暈都可能會係身體唔舒服嘅先兆。
最後都提醒返，如果唔想懷孕，下次唔想咁擔心，都會建議做返適合你哋嘅安全措施，例如用安全套或者食避孕藥。
希望幫到你 