本人男
尋日同女朋友做愛時，一同高潮，之後我的陰莖被女朋友下體迫咗出黎
其後就發現我的陰毛有白色黏液，然後安全套入面近環嘅地方，係套入面，發現有精液
姿勢：男上女下
有射2次精
- 請問女朋友會唔會有機會懷孕？
- 如果再次避免發生呢啲事情？（即係疑似精液流出）
- 如果有需要的話，現在係假期，邊度有醫生睇，拎事後丸？
Halo
我想了解吓，你提及到有兩次嘅射精，想問第一次射精後到再發生性行為時，有冇換到新嘅安全套？同埋係唔係全程都有使用安全套？
暫時以目前嘅情況嚟睇，我唔能夠答你意外懷孕嘅機會率有幾高。其一，但如果你喺兩次射精之間並沒有換上新嘅安全套，然後繼續發生插入式性行為，咁精液流入對方體內嘅機會就會比較高。其二，因為唔知道你精液流出嘅時間同程度係點，所以都唔能夠肯定精液有冇流入體內。所以呢個情況下，如果精液係一早已經流入體內嘅話，而你另一半事前無服過任何避孕藥，咁意外懷孕嘅風險就會比較高。
所以如果要再次避免呢種情況，有三個方法你可以留意吓。首先，要選擇適合嘅安全套。安全套都有分尺寸，部份朋友唔太清楚而可能選擇咗唔適合自己用嘅安全套。而尺寸唔啱嘅安全套，有機會會令到安全套冇辦法完全緊貼性器官，而令體液喺性行為期間流出。其次，確保每次射精後即刻把陰莖連同安全套拔出對方體外，而如果需要再次進行性行為，必須確保有更換新嘅安全套，以免令體液在性行為期間或完事後流入對方體內。最後，除了安全套以外，亦可配搭事前避孕藥令避孕成功率提升。不過留意，雖然事前避孕藥並唔係醫生處方藥，但建議初次服用者經由醫護人員評估下選擇合適的藥物。
最後，由於正值假期期間，最直接、方便而又合法的途徑下取得事後藥便是到私家診所，經由家庭醫生處方。留意，事後藥需於性行為後72小時或120小時內服用，越早服用效果越大。如果你考慮完以上情況後決定服用事後藥，記得要去診所，由醫生評估下先可以獲得相關藥物
1個讚
我全程都有戴住安全套，我射完一次但女朋友未高潮，就留在她身體繼續努力
咁我都約咗今日睇政府門診，希望有事後丸提供…
我想問下
- 安全套有分大小？ 但如何睇？
- 事前避孕藥要提前幾耐食？
- 事前避孕藥要食幾耐？
- 事前避孕藥對身體有咩影響？
安全套係有分大小的，就好似平日我哋買衫會有分尺碼一樣，需要透過量度陰莖嘅大小再決定要用咩尺寸嘅安全套。而安全套一般會以【 寬度 (Nominal Width)】或者【 直徑 (Diameter)】去顯示：
寬度 (Nominal Width) 【歐美／香港常用】
- 安全套擠扁時橫向嘅長度
- 數值上係圓周 (Circumference) 嘅一半
- 量度陰莖充血時／物件根部嘅圓周，將圓周數值除二就會得到【寬度】嘅數字
直徑 (Diameter) 【日本牌子常用】
- 安全套放平時圓形的直徑
- 算術上 直徑 x 3.14 = 圓周
- 量度陰莖充血時／物件根部嘅圓周，再除以3.14，就會得到【直徑】嘅數字
安全套嘅包裝盒上面通常都會寫有寬度或者直徑嘅數字，方便消費者去選擇。亦有一啲牌子唔會刻意係包裝上列出呢啲數值，有機會要上官網或者參考一啲性用品商店網站嘅資料。詳情可以參考： Instagram
事前避孕藥係需要長期服食才可以維持避孕功效，因為事前避孕藥係用荷爾蒙去達致避孕嘅效果，如果連續七日準時服用，身體已經有足夠嘅荷爾蒙去避孕，之後發生性行時就可以唔需要額外使用其他安全措施，例如帶安全套。但就需要每日準時食藥。一般事前避孕藥係分兩款，即使經期期間係無服藥（21粒款避孕藥），及經期期間服用含非活性成分嘅藥丸（28粒款避孕藥），當然選擇服用事前避孕藥作長期安全措施前，都需要搵醫生檢查，睇下係咪適合服用避孕藥。
事前避孕藥係需要長期服用的，一旦決定唔再服用，性行為時就要採用其他安全措施。
事前避孕藥既副作用主要係服用口服避孕藥初期發生，主要係有機會出現乳房漲痛嘅情況，係常見嘅副作用之一。其他常見副作用就包括噁心、輕微陰道出血、體重增加、頭暈、情緒低落等。之後服用得耐D，身體適應左藥效，情況就會有好轉，無需太擔心。
總括黎講，因為事前避孕藥都係屬於荷爾蒙藥物，即使依家藥物一般都係較新嘅一代，劑量亦都係好少，但係始終都係屬於外來嘅人造荷爾蒙，都有機會令你身體出現變化（例如分泌物量增多、體溫稍微升高），但原則上身體狀況變動嘅幅度唔應該太大。如果身體有出現明顯變化／感到不適，建議儘快同醫生講你嘅情況 ，睇下會唔會有需要換其他牌子嘅避孕藥，或者會唔會本身身體唔太適合服用避孕藥。
1個讚