請問我已經連續服用欣嘗避孕藥超過一年，呢幾日身體唔舒服，琴晚11pm食完排藥第三粒藥之後4:30am起身嘔吐，唔見嘔吐物有避孕藥，而且時間間隔5小時，所以冇補食避孕藥。今日照常11pm食第四粒避孕藥，1小時後嘔吐，在嘔吐物入面搵唔到粒藥，呢種情況需唔需要補食避孕藥？如果需要的話，盒藥少咗一粒咁第21日要點處理？唔該曬
Hello～你好
本身避孕藥喺服食後四小時內，身體就會吸收到藥效，假如第一次嘅情況係夜晚11:00食完，凌晨4:30左右有嘔吐，係唔會影響身體嘅吸收；如果係第二次嘅情況，11:00食完然後一個鐘內有嘔吐，身體會未吸收得切，呢個情況就需要留意返避孕藥嘅說明書指示，喺12個小時之內補食，如果少咗嘅藥可以直接開過新一盒食。
不過，如果本身跟足指示，連續食避孕藥超過一年嘅話，避孕藥喺身體已經建立咗藥效，意外懷孕嘅風險相對較低。
假如持續出現嘔吐情況，而且多數係食完避孕藥之後發生，有機會係避孕藥嘅牌子未必適合你，呢個情況會建議諮詢醫生嘅意見，睇吓會唔會需要換其他牌子嘅避孕藥。而換藥/嘔吐情況持續嘅呢段時間假如有任何疑慮嘅話，都可以選擇用其他嘅避孕方法（例如安全套）
希望你身體盡快康復