你好！我食左差唔多半年yaz
每日大約1530-1800食藥 無漏過
都有好多疑問（例如食物藥物相沖，要補食）
如果感冒 腸胃炎 發燒，要食其他西藥（例如要消炎，panadol) 要隔幾耐？其實影唔影yaz藥效？
啲人成日話抗生素有影響，咁真係唔食得？定隔4-6個鐘？
食物方面，有人話食藥前後2小時最好食野
？
我知西柚 葡萄柚一定唔得～ 有冇其他野都唔得？桔子？香蕉？定其實正常飲食係得？
除左酒精，有冇咩飲品又係一定唔得？定可以相隔時間就可以？
補食方面，如果服食後半小時內有嘔吐症狀就要補食一粒（咁個個月咪少左粒藥？）咁如果係肚瀉呢？又要唔要？
每日可以同時間食藥就梗係最好啦…其實同一時間服食既定義係點？
麻煩晒
Hello~等我逐一回覆你先
常見傷風感冒腸胃炎等嘅西藥入面，只有部份抗生素會對避孕藥藥效有影響，由於食抗生素都有機會每隔幾個鐘又要再食，藥效亦有可能係長效型，錯開服藥時間唔一定能夠避免相衝，所以最好係睇醫生時，向醫生提出自己有食緊事前避孕藥，等醫生幫你安排適合嘅藥物，或者睇吓會唔會建議服藥期間改用其他安全措施
食物方面最主要都係避免服用避孕藥時，同時進食西柚類食物，其他食物則無大礙～
暫時研究指出酒精並唔會直接影響避孕藥嘅藥效 不過，過度飲酒有機會導致嘔吐，假如嘔吐同服用避孕藥之間相隔時間太短，有機會會導致避孕藥未能比身體完全吸收，令避孕藥嘅藥效減低。所以準確嚟講，酒精本身係無話會影響避孕藥功效
補食方面，如果服用避孕藥後3、4小時內嘔吐或肚瀉，都建議補食避孕藥，但詳細時限建議睇返說明書，因為唔同牌子有機會有唔同。當月唔夠避孕藥嘅話，可以再開一排新嘅，或者亦可以特登預留一排係for 補食用嘅，咁就唔會打亂本身嘅節奏
因為服藥時間太浮動，就未必能夠維持穩定嘅荷爾蒙水平，繼而影響藥效，尤其係一啲低劑量嘅事前藥，藥效會更容易受服藥時間影響，所以最好都係每日同樣時間服用，意思係琴日1530食，今日、聽日都同樣1530食 如果覺得有啲困難，可以依據個人生活習慣，揀一個合適嘅時間（例如每日都係呢個時間食飯或者起身），較個鬧鐘提醒自己食藥，咁就萬無一失喇～
希望以上可以解答到你嘅疑難
謝謝你解答
另外都想問下 因為食開YAZ
咁如果係四粒白色無藥性既日子
食少少酒應該唔大問題？
Hello 你好呀~ 酒精係唔影響避孕藥嘅吸收同藥效嘅，所以只要冇嘔吐就冇問題。