我嘅月經週期一直都唔準嘅，有時18-20日黎一次，有時35-40日黎一次，黎嘅月經量正常多嘅話就會6日就完。
上一次正常嘅經期係11月3號到8號，但我11月21號開始又黎一次，量少啡色嘅黎左一個月有多，去左睇中醫開藥，12月30號先停左，而我係12月16同23號都同男朋友做過，冇戴套，冇射入去。
今日1月7號我去完廁所擦下面發現有啲紅色嘅分泌，底褲只有好輕微嘅紅積，幾乎睇唔到，我又買左驗孕黎驗係陰性，但因為唔係安全性行為都驚會懷孕，想問會唔會係着床出血，定係排卵出血？
Hello 你好啊~ 首先解釋吓咩叫着床出血先，當受精卵成功依附喺子宮內壁上，就有機會導致輕微出血。見你都有驗孕，結果為陰性，而且同發生性行為嘅日子已經有相差最少11日，得出嚟嘅結果都係可靠嘅，唔需要太擔心懷孕嘅問題。排卵期都有機會出血，但係見你嘅月經周期一直都唔準，所以我哋都好難判斷係唔係排卵期出血。
另外都提返，喺嚟月經嘅時候發生性行為或者體外射精都唔係一個有效嘅避孕方法，記得揀返適合自己嘅安全措施啊。
想知道係咪我就算係黎緊啡色分泌嘅時候做左，相差11日驗孕係陰性就係安全？懷孕嘅機會高唔高？大約係幾多機率？
同埋想知，着床出血嘅分泌係咩樣？而排卵出血又係點嘅樣？我出嘅血係去完小便擦下面先會有，顏色係啲尿+分泌物+淡紅色咁嘅血絲咁，小腹有啲下墮感。
Hello~ 而家市面上嘅驗孕棒係透過檢驗尿液中卵子受精着床後會產生嘅荷爾蒙水平去得到結果，一般嚟講卵子受精着床需要6-9日時間，所以喺發生性行為11日後去進行驗孕，結果都會比較準確，高達97-99%。
着床出血同排卵期出血都係少量嘅點狀出血，淡紅色或者淺啡色都屬於正常嘅顏色，大約1-2日就會消失，如果單靠觀察未必可以分辨到。
如果我之後想再確認有冇懷孕，咁我係咪可以再驗多次？因為我之前就算係排卵都唔會有出血嘅情況，好驚，心理壓力好大
我今日有次去完廁所擦下面個陣有一點血係紙巾上面，真係得一點，所以我仲係好驚係着床出血，我之後應該點做好？唔該哂
希望可以盡快回覆，真係好驚
首先，你已經進行過驗孕，而結果係陰性，只要呢一次驗孕係喺高風險嘅性行為之後第11日進行嘅話，結果都會完全反映你身體嘅話受孕情況，係陰性就代表你冇懷孕，所以係絕對準確同可信，唔需要太過擔心。
至於你另一個問題，就係經常性地會有唔同嘅出血情況，而且時間亦都唔係正常週期性咁出現，呢個應該係同你本身週期唔穩定嘅情況有關，呢啲都好多時候都會係一啲作月經前嘅分泌，又或者你真係嚟月經，所以如果你都清楚自己嘅週期係唔係咁穩定，都建議返盡量唔好作出一啲高風險嘅性行為，而每次性行為都做好安全措施，避免出現異樣嘅時候引起不安，擔心有懷孕風險。不過都想提一下，如果你經常都有出現一啲不規律嘅出血情況，都需要去搵醫生檢查一下身體，諮詢一下，睇下會唔會身體有其他嘅問題出現，確保呢一啲出血情況都唔係因為其他原因而引起。
另外，想講自行驗孕其實喺高風險嘅性行為後七日可以進行，而結果亦初步反應咗你嘅懷孕情況，至於第十一日係就完全準確，所以如果你有日後擔心自己會唔會有懷孕風險，都可以喺性行為之後嘅七日甚至乎11日之後進行驗孕，咁結果都係準確，同埋可以完全反應到你有冇懷孕。