我之前試過連續兩年食yaz 嘅避孕藥，停左大半年之後食番，而家食左差唔多兩個星期。
我係月經第二日食嘅，今個星期開始一瞓醒覺個心口就會出晒汗，個人好熱氣，呢兩日連續飲左兩日涼茶（唔知係咪太寒涼），尋晚開始流啡，到今日個量多左啲。
請問呢啲症狀關唔關食避孕藥事？我之前食過兩年都冇類似嘅情況發生。
Hello～雖然你之前食過避孕藥，但係中間經歷過停藥，需要再重新適應返荷爾蒙嘅轉變，而且身體會隨年齡有唔同改變，所以避孕藥嘅副作用都會重新出現。不過大部份情況之下，副作用都只會維持一至三個月，假如流啡、盜汗嘅情況三個月後都持續出現，有機會係呢款避孕藥未必適合你，需要轉第二款避孕藥。如果係咁嘅話，理想嘅情況係向醫生查詢一下，睇吓邊款避孕藥比較適合你。
希望解答到你嘅疑問
我上網做左啲research，有人話12個鐘食一粒，即係一日食兩粒，連續食幾日就會停止出血，就可以變番1日1粒，請問呢啲方法可以試吓嗎？
另外想問而家嘅避孕功效work嗎？食左兩個星期雖然有流啡但係咪行房已經有避孕功效？
謝謝
Hello~ 我哋建議都係根據返避孕藥説明書指示或醫生指示服用避孕藥，因為所有人嘅身體情況都唔同，而唔同牌子嘅避孕藥或多或少都會有差別，所以唔建議隨便改變劑量，因為可能會令副作用加劇。
避孕藥如果有根足指示服用，避孕功效係高達99.7%，而你持續服用咗兩星期，體內嘅荷爾蒙水平理應足夠，如果想再加多重保障嘅話，可以佩戴埋安全套~
如果流啡嘅情況令你非常在意，可以查詢醫生意見，睇吓會唔會有其他情況，或更適合你嘅事前藥款式～
明白，純粹好奇問吓，因為我唔係好明避孕藥嘅原理，想知點解改做一日食兩粒會有機會減少流啡？
Hello你好啊～避孕藥係主要透過人造荷爾蒙，去阻止卵泡成熟、抑制排卵達致避孕嘅效果。避孕藥中嘅荷爾蒙有機會影響子宮內膜，令內膜不穩定，出現點狀出血，俗稱流啡嘅情況。一日食兩粒係唔一定可以減少流啡嘅情況發生，食多過一粒有機會造成荷爾蒙水平過量，令副作用更加嚴重。
見你都係啱啱開始食返避孕藥，身體都需要時間適應，流啡嘅情況會慢慢減少，如果超過三個月都未有改善就記得去睇醫生啦。