我已經食咗優悅事前避孕藥快一年，我呢一年嘅月經都係非常準確來，就算漏吃也是24小時內補食。
而2月1日和男朋友早上有同房，但因為我前一晚1月31日唔記得咗吃藥，2月1日早上補食，但怕唔安全已經戴咗安全套，但完事發現安全套穿了。當時已經馬上食咗一款叫安立婷緊急避孕藥（係藥房購買），呢隻緊急避孕藥我都係呢間藥房半年前買過一次食，但個次我嘅月經都係正常時間來，並沒有影響。
但今次正常根據我食優悅我係2月4日要來月經（已經係白色第4粒），而2月5號我都照開咗新一盒優悅食，但是今次到依家3月3號都仲未嚟（今日係最後1粒白色）
我已經食完2月嘅優悅事前避孕藥，正常聽日3月4號也要來月經，如果聽日還沒來，我就兩個月沒來月經了。2月份我每個星期都有驗孕，但都是陰性沒顯示懷孕，我上星期五2月28號朝早也驗了，都係顯示沒有懷孕。
請問我這個情況，懷孕機率大嗎？還是因為緊急避孕藥的藥效影響了經期？謝謝！
Hello你好呀～睇返你嘅情況，唔需要太擔心。首先你已經食咗有一年嘅事前避孕藥，真係已經有足夠嘅荷爾蒙水平去避孕。睇返你2月1日嘅情況，有喺12-24小時補食返，所以藥效係冇影響到嘅。雖然安全措施失效，但係你都有補食事後丸，事後丸係透過大量嘅人造荷爾蒙，去抑壓排卵或改變子宮內膜嘅狀態達致避孕嘅效果，係有機會影響經期。
你提到2月份每個星期都有驗孕，而且結果都係陰性，所以都唔需要太擔心懷孕嘅問題，有時候壓力或者情緒都會影響經期，可以試吓放鬆心情，令自己唔好太過繃緊。
感謝，請問我應該停止食用事前避孕丸直到來月經後，先再食返事前避孕丸嗎？而且想問我見啲人話食咗事後丸正常會有撒退性出血，但我已經兩個月未來月經？請問都正常嗎？Thankss!
Hello, 明白你嘅情況！食避孕藥同埋事後丸後月經遲到，確實會令人好擔心。我會遂一回應你嘅疑問~
Q: 應唔應該停藥?
A: 即使月經遲到，都建議你繼續按時食藥，唔好停藥。停藥可能會令荷爾蒙更加唔穩定，影響月經週期。如果你今日（3月4號）月經都未嚟，可以照常開始新一盒藥，繼續保持避孕效果。
Q: 食咗事後丸會有撒退性出血?
A: 食完事後丸之後嘅一個星期內通常會出現岀血，呢個情況係因為子宮內膜剝落所導致嘅，即使有排卵，都可以令受精卵跟住內膜一齊排出，避免懷孕，依一次嘅岀血算係月經（因為無受精卵著床），所以下一次月經週期可能會受影響。不過唔係每個人都會有，如果你冇撒退性出血，都係正常嘅。
Q: 食事後丸嘅影響?
A: 食事後丸後，其中一個副作用令到往後嘅經期變得唔規律 ，有機會提早或廷遲經期，血量都會有機會增加或者減少。但並唔喺每個人食事後丸之後，都會經歷副作用。事後丸嘅副作用可能會影響1－2次經期，可能你嚟緊1－2次月經嘅月經周期長度、流血日子、流血量、經血顏色質地、經痛程度、經前不適情況等等都會同平時有啲唔同，係正常嘅。
Q: 月經遲到嘅原因?
A: 正如我地同事所講，長期擔心、壓力會影響荷爾蒙水平。另外，生活作息、飲食、生病等都會影響月經週期。而且事後丸含有高劑量荷爾蒙，會打亂你嘅月經週期，導致月經遲到或者不規則。呢個情況通常係暫時性嘅，身體需要時間恢復。
目前我地可以放鬆心情同觀察先，如果月經繼續遲到，或者你有其他不適（例如嚴重腹痛、異常分泌物等），建議睇醫生。