打左3個月一針嘅避孕針有一年左右，期間一路都無黎M，上年9月第一次轉一個月一針嘅避孕針，原意係想黎返M，打完第一針都有黎M，量唔多，之後都有黎M，但係近呢兩個月突然無黎M，其實係咪因為轉針，所以導致經期都係唔正常
你好，聽你咁講你係想嚟返月經所以轉針，想了解一下轉針前有無同醫生講係想嚟返月經？
避孕針有分單一荷爾蒙同混合荷爾蒙，單一荷爾蒙避孕針嘅有效期係3個月，估計你之前就係打緊呢隻針。不過接受注射期間因為體內荷爾蒙改變而出現月經不規則、月經流量減少、或閉經等副作用。
如果想恆常有月經可以考慮打混合荷爾蒙避孕針，因為係一個月注射一次所以可以令經期規律化，但係由於佢含有雌激素，所以亦唔係每個女性都適合使用。
照你所講嘅情況，月經嚟咗一次又再不規律，有可能因為初期轉針有關，情況應該會慢慢有改變，如果再過一兩個月都係無月經，建議你向去開打避孕針嘅診所見醫生了解返身體情況，目前就唔使太擔心。