我同男朋友已經一齊三年，咁耐以來都未試過進行性行為，親熱撫摸每次都係我做主動，但都係差唔多半年先有一次，我覺得佢性慾真係好低，從來冇主動過，好想試吓同佢再進行深入啲嘅關係，但係唔知點開口要求好。。
Hello 明白咁嘅情況可能令你困擾，亦都可能會覺得攰，又性慾又要比較耐先有一次，又每次都自己做主動。
的確，每個人嘅性慾、個性或者個人界線都會唔同。可能有啲人性慾本身比較低，有啲人個性令佢未必會喺性方面咁主動，有啲人會覺得可能自己未準備好，有啲人可能就係本身對性唔係好有興趣，或者有啲人係擔心自己表現，驚自己滿足唔到對方。仲有有好多好多唔同嘅原因可能會導致呢個情況，呢度都講唔晒。
如果想更進一步嘅話，最好都係同對方溝通多啲，了解對方係因為咩原因，或者其實對方係咪有咩諗法或者顧慮。
如果唔知道可以點樣了解對方多啲，都可以試吓從以下兩個方式，嘗試了解對方嘅諗法或者顧慮：
1.認真坐低咁同對方傾
你可以搵個機會，搵個私密嘅空間面對面deep talk咁傾。（唔方便的話，喺whatsapp/signal/ig等等，其他你哋平時網上溝通嘅方式傾都得）
你可以好好咁表達你嘅想法同感受，同埋你嘅期望，因為有機會對方都未必咁清楚你嘅諗法。你亦都可以關心同了解對方，問吓對方對於而家嘅關係同埋性嘅互動有咩睇法，而如果再更進一步又有咩諗法。最後可以睇吓有冇機會可以達成一個大家都滿意嘅方案。
- 喺日常之中旁敲側擊
如果怕尷尬或者唔想咁認真咁傾，你亦可以喺日常傾偈嘅時候，以一個比較輕鬆嘅方式旁敲側擊，了解吓對方對性嘅睇法係點樣。可以係share時事新聞、share其他朋友嘅事情，甚至係share一啲搞笑reels或者meme，都可以嘗試了解下對方對關係、對性會有咩睇法，或者引伸討論，從中去了解對方。
最後，每個人都有自己嘅諗法、界線同埋顧慮，所以如果最後對方嘅諗法唔係最理想，都要互相尊重。亦都唔係每個人都咁善於溝通，所以可能有機會要嘗試多幾次。
希望幫到你