我gf上個月3/27嚟M，我地4/12又做咗，冇戴套，但係淨係插咗幾下就掹返出嚟，佢係第一次，做完後兩日有出血，想問懷孕機率大唔大？
佢不嬲嚟M都遲幾日，如果有咗點算
我17佢15，我要坐幾多年？近排焦慮到頭暈又嘔，真係唔知點算
補充返見到個app顯示4/12係排卵期
真係好驚賴嘢
Hello 呢個情況都有懷孕風險㗎，因為你哋當時冇用安全措施之下陰莖進入過陰道，即使冇射精都好，性興奮時分泌嘅pre-cum尿道球腺液都可能含有精子，所以都會有風險。
擔心嘅話，就可以考慮買返枝驗孕棒驗孕，買驗孕棒係冇年齡限制，唔會check身份證，可以係個人護理商店或者藥房等等地方買到。基本上係性行為後11日驗孕，只要按指示驗都驗到準確結果㗎啦。
至於月經的確會受好多因素影響，可能會遲到或者早到，排卵期都一樣，所以就好難講到，不過只要嚟M就代表月經嚟之前發生嘅性行為都冇導致懷孕。
最後都提醒返，係香港發生陰道交性行為合法年齡係16歲。同埋以後發生性行為，就算冇射精都好，只要性器官之間會有直接接觸，都建議要做返安全措施，唔洗事後咁擔心。
不過呢到都有好多人幫到你嘅。有需要可以向信得過嘅人或者機構傾下，亦都可以搵我哋都得。
希望幫到你哋
佢呢幾日有腹漲
請問懷孕機率大唔大？我地諗住聽日就驗
同埋上個禮拜有嘔，成日攰，不過佢捱開夜，唔知係因為有咗定係佢自身身體狀況
Hello 
熬夜、壓力、腸胃問題或經前症候群（PMS）都會導致嘔吐、腹漲嘅情況，受精卵著床一般需要6-9日，所以係性行為後7日使用驗孕棒的話會有初步嘅結果，而係11日後或者預計經期嘅日子驗孕結果會更加準確，4/12至今已超過11天，可以比較理想係儘快進行驗孕測試，方便安排後續嘅處理。 了解到而家有好多身體狀況都會令你地擔憂，但更重要係盡早確認狀況以減少不安，另外，因為大家都處於未成年嘅狀況，假如意外懷孕，都可以先搵信任嘅人、以及伴侶等傾訴，並透過搵相關機構（例如家計會、青躍、母親的抉擇等）去同職員／工作員討論點樣面對呢個處境，同埋點樣嘅處理方式會比較適合當下嘅狀態（例如身心狀態、財政能力、成長階段等）。
希望幫到你地 
如果真係有咗我地諗住落咗佢，請問係咪要俾家長知？同埋15歲可唔可以做？我地仲要讀書
佢之前都冇試過肚漲。。。
假如係做檢查到準備終止懷孕手術嘅過程，都唔會需要通知家長，亦唔會突然有家長嘅聯絡方式。但合法終止懷孕嘅手術，如果係未成年嘅話，就會需要家長或者監護人簽署同意書，同時因為終止懷孕係一個重大嘅手術，隨時會有生命危險，而且對心理上都會造成好大影響，所以都會建議通知返家長或者監護人，喺屋企人嘅照顧之下去做呢個決定會比較理想。
所以如果決定要終止懷孕，首先要確認自己嘅懷孕週數，因為週數嘅長短會影響自己去邊個機構／醫院接受終止懷孕。例如家計會只會為懷孕期10週內嘅就診者提供藥物終止懷孕／手術終止懷孕（真空吸引術）。
以家計會為例，家計會醫護人員會首次接見求助者嘅時候，會先問你個人病歷、進行尿液驗孕，同埋向你提供有關終止懷孕的基本資料及輔導。由於家計會認為終止懷孕係一個重要嘅決定，所以會建議求助者於初診後重新慎重考慮係咪要進行終止懷孕。假如求助者決定終止懷孕，家計會護士將安排就診者再約見醫生，商議及評估終止懷孕風險，同埋進行身體及盆腔檢查，再確定就診者係咪適合喺家計會進行終止懷孕。
以下係家計會嘅網頁，可以比你參考一下：https://www.famplan.org.hk/zh/our-services/clinic-services/termination-of-pregnancy/content
另外坊間都有其他協助意外懷孕個案嘅機構，包括青躍：https://www.instagram.com/teenskey_youth/；母親的抉擇：https://www.motherschoice.org/get-help/，佢哋除咗會提供醫療上嘅支援，亦會提供情緒支援同可行嘅方案
以往遇過好多個案，屋企人知道咗當刻會有情緒，但係都會願意提供支援，社會上亦有好多唔同機構願意從旁協助幫忙處理類似狀況，暫時可以先逐步了解實際情況，再一步一步安排之後嘅事情。
想問如果真係有咗我會唔會坐監？我近排焦慮到瞓唔到，食唔落。
佢又肚脹，佢之前都唔會
今日冇時間搵佢驗，等星期六日有時間就驗
Hello~明白你好擔心，所以第一步，會建議你儘快進行驗孕！
知道咗結果，先可以知道接下來要面對乜嘢同埋可以點處理~
驗孕只需要一支驗孕棒 + 一泡適量嘅尿液，唔會用你好多時間，所以真係真係儘快去做檢測啦
另外都補充返，肚脹亦不直接等於懷孕，懷孕初期亦未必會肚脹。好似同事所講，熬夜、壓力、腸胃問題或經前症候群（PMS）都會導致嘔吐、腹脹嘅情況，所以有機會係最近太大壓力、焦慮緊張，所以身體先會出現不適狀況。
而假如確認懷孕後有任何醫療需要，我哋都鼓勵你地儘快去聯絡家計會。家計會係唔會喺無知會你哋嘅情況下就通知家長或者報警嘅，所以可以去做咗檢查同埋了解各種選項先。
關於法律責任方面，無論女朋友是否懷孕，與未成年少女發生性行為本來都已經係有法律風險嘅行爲。即使無懷孕，對方家長知道之後都可以選擇報警。但到時會採取邊啲法律行動，都會受好多唔同因素影響，例如雙方家長意願，社工、醫護嘅專業評估等。
即使真係「通報」咗上去或報咗警，會唔會「落案起訴」，甚至「罪名是否成立」，「判處咩程度嘅刑罰」係幾件獨立嘅事 所以呢一刻未需要直接覺得會要坐監，可以優先確定咗有否懷孕先～
如果你想搵人傾多少少，或者需要專業意見或轉介，除咗可以搵家計會、母親的抉擇、青躍之外，都可以WhatsApp / Signal 聯絡我哋嘅工作電話 6077 3941 希望以上資訊幫到你
佢琴日起身話肚痛，有黎M feel，但係冇M血出
同埋成日都好眼瞓
Hello～都明白你哋好擔心，擔心懷孕會影響之後嘅人生或者會有刑罰，現階段最緊要嘅係知道有冇懷孕，而依家去驗孕其實已經會有一個好確實嘅答案，都希望你哋盡快去驗孕。加上好多時其實太大壓力或者心理壓力會影響埋身體，就好似有啲女性會壓力大到遲咗嚟M，呢啲平時身體唔會出現嘅情況。
我哋都明白可能會擔心接受現實嘅一刻，可能會想睇吓會唔會嚟M，但係都希望俾你知道，即使係終止懷孕都係越快做越好，一日未確定到係咪有懷孕，都好難確實知道下一步要點做。