我上星期第一日嚟M，而家想試吓食避孕藥。
第一次食嘅話，係唔係一定要第一日嚟m嗰陣時食？
如果嚟m後兩個星期先食，仲有冇用？
Hello~避孕藥無論喺幾時開始食都可以，只係如果要體內有足夠荷爾蒙水平去避孕，最少需要服用嘅日數就會唔同
如果你喺月經周期頭5日開始食，咁食7日體內已經開始有足夠嘅荷爾蒙水平去幫助避孕。
如果你喺月經周期頭5日之外嘅日子開始食，咁就最少需要服用14日，體內先開始有足夠荷爾蒙水平幫助避孕，因此會建議你喺頭兩個星期內，如果想發生性行爲，最好都要配戴安全套
如果你係第一次食避孕藥，我有幾個建議俾你
-
服用前諮詢醫生意見。因爲每個人嘅體質都唔同，每個牌子嘅避孕藥及其副作用都唔同，所以最好問問醫生自己適合食邊一款避孕藥。
-
服用初期或許會有副作用。因爲身體需要時間適應，所以啱啱開始食嘅頭1-3個月可能會出現某啲副作用，例如頭痛、月經不規律、乳房脹痛等。
-
規律服用有助身體適應。最好每日固定時間服用，身體先會維持穩定嘅荷爾蒙水平，提高避孕率。
-
24小時内發現漏食儘快補食。如果喺24小時内發現漏食，你可以即刻補食，然後喺下一粒正常時間繼續服用。
-
漏食超過24小時需要重新開始服藥周期。如果超過24小時先發現自己漏食，咁就要好似一開始咁寫，重新開始連續服用7-14日後，身體先可以重新建立足夠荷爾蒙水平幫助避孕。