1.請問男生與性工作者發生無套口交後，有多大機率有性病
2.假設性工作者歡有性病，有多大機率得性病
3.是否可以於7日後進行檢查，以及7日後可以檢查的性病有什麼
Hello, 逐一回覆你啦
Q：請問男生與性工作者發生無套口交後，有多大機率有性病？
A：首先你會覺得去搵性工作者就會感染性病，其實係受到社會文化中對性工作者嘅歧視同污名化，將佢地同「污糟」、「性病」連結。但其實好多性工作者為咗生計同埋自己嘅安全同埋健康，係會恆常去做檢查，同埋會使用安全套保障安全。但係有時有啲客會拒絕使用安全套，甚至性行為中途除套，加大性工作者感染嘅風險。如果性工作者本身唔會進行陰道交，淨係會幫客人手交或者口交嘅話，感染性病嘅風險其實都相對比較低。同埋其實無論係口交定係陰莖陰道插入式嘅性行為，你都可以主動要求使用安全套，對自己同對方都係一份保障，如果你嘅陰莖有病菌嘅話，使用安全套會避免對方口腔感染到細菌。性工作都係工作，性工作者都值得被尊重。
而性病傳播途徑係當高風險體液，例如精液、尿道球腺液、陰道分泌物、腸液同血液，直接接觸到性器官、比較脆弱嘅黏膜組織（例如口腔、肛門、陰道、尿道口），特別係當上面有開放性傷口（正在流血）先會有比較大機會可以造成性病傳播。
經口交傳播嘅性病有梅毒、衣原體、淋病同疱疹，如果對方感染咗呢啲病菌，而且有病徵，口交都會係有風險嘅性接觸。
Q：假設性工作者歡有性病，有多大機率得性病？
A：假設對方有明顯病徵及自己有開放嘅傷口，感染風險極高。
Q：是否可以於7日後進行檢查，以及7日後可以檢查的性病有什麼？
A：感染性病之後會有一段時間嘅潛伏期，係呢段時間裏面病毒或者病菌潛伏喺體內唔會有任何病徵。而即使你已經有病徵都好，都需要過一段時間，等病毒嘅數量累積多啲，先至可以透過唔同嘅方法檢驗出病毒/病菌。以下就係一啲常見性病嘅潛伏期：
生殖器疱疹（疱疹二型）：約2-5天
淋病：約1-14天
滴蟲：約4-20天
衣原體感染：約7-21天
梅毒：約9-90天
性病疣（椰菜花）：約 1-8個月，平均為3個月
只要你係進行過一次唔安全嘅性接觸之後大概3個月，做一次全面嘅性病檢查，其實已經可以檢查到全部嘅性病。
而發生唔安全性行為後7日可以初步檢查淋病、衣原體、 皰疹是否感染嘅。
以下機構提供免費嘅性病測試，有需要都可以參考下：
政府社會衛生科服務診所：各類型性病檢查（較全面，能即時知結果及比藥）
關懷愛滋：25歲或以下青少年、男男性接觸者－愛滋滋病病毒／梅毒／淋病／衣原體／丙型肝炎
香港愛滋病基金會：愛滋滋病病毒／梅毒／丙型肝炎
再思社區健康組織 (C.H.O.I.C.E.) ：愛滋病病毒／梅毒
可以先留意自己身體有無出現明顯病徵。如果已經出現下體痕癢、小便刺痛、分泌物異常、下體生粒粒等病徵時，就可以先及早求醫。
咁假設性工作者有明顯口腔傷口，但係被口交者冇傷口，係咪都比較細機會有，定係都有機會由尿道口感染。
Halo，如果真係好似你咁講，一方口部有傷口而又本身又有性病相關嘅細菌/病毒，咁進行口交的確係有較高風險傳染性病嘅～
不過正如同事上面咁回覆，如果真係有擔心嘅，都不妨去做一個次檢查吧。始終唔係種種性病都可以肉眼所見到病徵，而如果你都有恆常嘅性行為，咁定期檢查都係種唔錯方法保護自己同性伴侶！ 