同伴侶想有regular性行為，但覺得只用安全套好似唔太安全，所以考慮緊開始食避孕藥，咁避孕藥+安全套好似穩陣啲…
想問下避孕藥要食幾耐先開始有效，同埋點知自己適唔適合食？開始食之後係咪唔需要考慮危機期安全期？如果長期食會唔會對身體唔好呢？
麻煩哂！
Hello你好呀～一般事前避孕藥都建議喺月經周期嘅第1-5日開始服用，連續服用7日可以令身體有足夠嘅荷爾蒙水平避孕。如果唔係喺月經周期第1-5日開始服用，就需要連續14日服用先可以有避孕嘅效果。
事前避孕藥未必每個人都適合服用，身體有長期病患，長期吸煙者，同時間有服用一啲精神科藥物，荷爾蒙相關嘅家族病史（例如乳癌）等，喺服用之前都建議諮詢醫生意見。
當你開始服用之後就唔需要再考慮危險期或安全期。只要每日定時服用，身體就會建立足夠嘅荷爾蒙水平去抑壓排卵，就再唔會有危險期嘅出現。一開始服用嘅時候，身體可能會有未適應嘅情況，但暫時都冇顯示長期服用會出現副作用，可以放心。