2年前受人慫恿接觸過一次性工作者
全程包括口交都有帶套 除咗手交之外
兩年期間身體完全冇不適 但我唔知平時嘅感冒係唔係性病引起，因為有人話性病可以感覺同正常人一樣
如果性行為期間全程戴套，且兩年期間冇症狀，生殖器冇異樣嘅話，感染性病機率有幾高？
Halo，先覆咗你比較擔心嘅問題啦，其實如果你喺任何模式嘅性行為期間有全程使用安全套，咁其實感染性病嘅機率率都已經非常之低。因為如果能夠正確使用安全套，又有全程佩戴，咁其實傳染性病嘅機會已經非常之低。
當然你聽其他人講都冇錯，部份性病係冇明顯嘅病徵，唔能夠透過肉眼判斷有冇患病。不過一般而言正常都唔會令到你係兩年間，間唔中出現小型嘅感冒
所以都唔使太過杞人憂天。但當然如果你都仲係非常之擔心嘅話我都強烈建議你去做吓唔同嘅性病測試，一般嚟講只要係性行為後三個月就可以做到詳細同埋相對準確嘅測試。而特別如果你嘅性生活都比較頻繁嘅話，我哋都建議你可以視乎情況選擇每年、半年、或者三個月進行一次檢查🫶🏻保障自己都同時保障其他人，同時亦求個安心。
最後，雖然我相信你都真係好擔心同埋緊張，不過都希望你明白性服務工作者並唔等於性病
好多時大眾都可能會將呢個性病嘅標籤放咗落佢哋身上，但其實只要有佩戴安全套地進行安全性行為，其實佢哋感染性病嘅機會率都唔會特別高。所以係呢件事上，至少我都比較放心你當時有進行到安全性行為。
當然，如果你真係仲好擔心，不妨去一啲唔同嘅機構進行性病測試吧。