如題
我10/5最後一次性行為（無套但體外射），而且我上年年尾停咗打避孕針，到今年年頭月經都唔係好準時。。但3，4月的月經慢慢回復正常
5月12號左右有黎月經但係比起平時少同遲左，11號都驗過冇懷孕嘅。。但係到今日都有好少量嘅啡色分泌物同子宮少少抽痛
我應該幾時再驗會好啲？
同埋有bb嘅機會幾大？
Halo，你呢個情況下，想了解返係未即係你由上年年尾後，就無再用過任何嘅避孕措施？
因為就咁睇上面嘅描述，如果你係無用過任何有效嘅避孕措施下（事前避孕藥、緊急避孕藥、子宮環、安全套、避孕針等），而且又進行無套性行為，咁其實都真係有懷孕嘅風險。體外射精並唔係有效嘅避孕方法，因為性行為期間，少量嘅精子都已經有機會進入體內。
所以如果你都想做驗孕嘅，可以考慮係最後一次性行為後嘅7-11日使用驗孕棒。所以你11嘅做嘅驗棒其實並唔能夠判斷到10號個次嘅性行為有無意外懷孕。係你呢個情況，你可以考慮下今日/聽日再用一次驗孕棒。不過要留意：每個牌子驗孕棒嘅使用方法都有少少唔同，等候時間同實際方法就睇要睇返說明書。不過使用方法通常都係拆開包裝後，將驗孕棒取尿嘅區域用尿液沾濕，要維持1-2秒確保取尿嘅區域成功沾濕，之後就根據說明書上面嘅指示等待一段時間。
另外，如果之後想再考慮返唔同嘅避孕方法，你都可以再去返家計會呀～
但係我係10號性生活後已經黎咗月經都會有機會懷孕嗎？
我今朝做咗驗尿，顯示為陰性，咁我係咪一定冇bb?
但係我仲係有胸口脹痛，同子宮抽痛果啲感覺
Hello 如果你係10號發生性行為，而之後又已經嚟咗月經，然後性行為後過咗11日之後又有驗過孕，驗孕係驗到陰性，咁基本上可以相信驗孕結果嘅。
至於胸口脹痛同子宮抽痛感覺，就未必同懷孕有關係，有機會會係排卵期影響，排卵期都有機會會出現呢啲感覺嘅。你可以留意住自己身體狀況，如果發現身體狀況真係好唔舒服，都有機會會係有其他情況，到時就有機會要睇醫生啦。