今次係第二次性行為，第一次時只有輕微血絲，今次性行為後去洗手間有血滴出黎，去第二次就冇再滴，但keep住抹都仲有血，而家用護墊仲有少少淺紅色，想問呢個血量正常嗎？
同埋上次黎m係5月3日，5月23日全程戴套性行為，冇射，請問懷孕機率大唔大？周期呢幾個月都是28-30日左右。唔該哂
Hello 明白你可能擔心身體出血狀況同埋懷孕。
首先就出血情況而言，呢個情況都係常見嘅，唔使太擔心，通常初期或者頭幾次發生插入式性行為，都有機會會有輕微出血嘅。初次發生性行為出血，有機會因為陰道冠破裂（亦即係俗稱處女膜）而出血。另外因為初期陰道未試過有任何異物插入，都有機會因為咁而擦傷陰道壁，從而導致輕微出血。其他原因就包括可能係潤滑不足（好多人都會出現呢個情況），或者性行為時姿勢影響或者太過激烈，都可能會導致出血嘅。
一般嚟講應該只會輕微出血，亦都應該只係持續好短時間。你可以觀察住自己嘅情況先，不過如果發覺出血量增加，或者一直冇停止，例如出血持續幾日，甚至出現異味、分泌物變異，或者覺得疼痛、痕癢等等，就可能係情況惡化或者發炎，到時就有需要睇醫生啦。
至於懷孕情況，因為你哋全程有用安全套發生性行為，所以都唔使太擔心，只要精子、尿道球腺液（即係陰莖性興奮勃起時分泌嘅透明液體）、精液呢幾樣嘢同陰道冇直接接觸嘅話，咁懷孕機會都唔高嘅，所以都唔使太擔心。
希望幫到你。
Hello, 我有用開app記錄經期，本身expect琴日6月1日會黎m，但今日都仲未黎。由5月26日開始有輕微胸漲，到近呢5日左右有明顯漲痛感。琴日同今日朝早起身去廁所，抹嗰陣都有少少啡色分泌物，但之後又冇了。
想問下呢個情況似係仲谷緊m，定其實係初孕症狀呢？都有啲擔心。
如果真係有左，較明顯嘅懷孕症狀例如作嘔，通常幾時會開始有？我驚太早驗孕會假陰性，但等待又好焦慮
麻煩哂
Hello你好呀，其實遲咗嚟月經都唔需要太緊張嘅，而且你只係遲咗一日，亦都有胸部嘅脹痛感同啡色分泌物，呢啲都係啲好明顯嘅經前症狀。雖然你哋有做安全措施，都好明白你會擔心懷孕嘅問題，可以試吓驗孕，喺性行為發生7日後就可以進行，會有一個初步嘅結果。所以而家都可以先驗孕，如果係陰性，就更可以俾你一個安心。其實一啲焦慮或者壓力較大嘅時候都會影響月經，都希望你可以放鬆心情，唔需要太擔心。