我同男朋友發生性行為冇用安全套，射左小小入去，會唔會有bb？
Hello~只要有精子直接進入咗陰道，就有機會接觸到卵子，就有可能造成懷孕，無論射少少定多多都一樣～ 所以而家有兩件事可以做
第一，喺限時內服用緊急避孕藥。如果你唔希望意外懷孕，而距離你發生不安全性行爲不足120小時，你都可以盡快聯絡家計會或私家診所，服用緊急避孕藥。緊急避孕藥係通過人造荷爾蒙去抑制排卵、改變子宮頸黏液嘅粘稠度，同埋改變子宮內膜環境，三管齊下咁達致避孕嘅功效，所以成功率可高達98%。提示返，緊急避孕藥係處方藥物，須經由醫生處方，唔建議自行經由其他渠道獲取，因為有可能係假藥嚟㗎～
第二，進行驗孕。受精卵需要6-9日時間著床，所以你可以喺性行爲後第7日進行驗孕，可以獲得初步結果；喺性行為後11日起進行驗孕，獲得準確結果。但如果你並唔想懷孕，用呢個方法會過咗緊急避孕嘅期限，一旦懷孕就需要進行終止懷孕嘅程序。所以如果你無意懷孕，建議用返方法一～
除此之外，如果之後想減低意外懷孕嘅風險，除咗正確使用安全套外，都可以選擇服用事前避孕藥或使用子宮環等嘅避孕方法，但就建議事先諮詢醫生嘅意見，睇吓你嘅身體適唔適合使用呢啲方法
但係有流反D精液出嚟，會唔會有B B? 已經發生左四日了
Hello～其實只要精液有進入過陰道，都會有機會懷孕。如果喺發生性行為後120小時內，都可以向家計會或者私家醫生求助，盡快服用事後丸。如果最後真係懷孕，都可以向專業人士求助，進行中止懷孕手術。